Read Zokam Job 16 Bible Online

Job 16 - Zokam bible

Job 16

¹Tua ciangin Job in dawng a:

²"Hih bang thute tampi ka za khin hi; na vek un a lunggim huai hehnemte hi lel uh teh!

³A mawkna-in na mutmutna kamte uh bei ngei lo ding hiam? Hong nasak bang kammal tawh kei hong busimsim lai ding na hi uh hiam?

⁴Note kei dinmunah om le uhcin kei zong no pau bangin ka pau thei ding hi; note ka lu hong peisanin note langah kam hoih nono ka pau thei mah ding hi.

⁵Ahi hangin ka kam in note hong hanthawn thei ding hi; ka muk panin hong hehnemin kong nuamtuamsak ding hi.

⁶"Pau taleng lah ka natna nuamtuam tuan lo a; ki-iip taleng zong a damsiang tuan kei hi.

⁷Hi takpi hi, Pasian aw, kei nong patkhiasak a; ka innkuan bup nong gamsak hi.

⁸Kei nong hencip khin a - tua mah kei teci a suak hi; ka gawn’na dingto-in kei langah teci a pang hi.

⁹Pasian in kei hong doin, hehin kei hong balkham a, a ha hong gawisan hi; ka langpa in a mitin hong sal gemgam hi.

¹⁰Mite kamka-in kei hong zahnuihsan uh a; hong zahpihna-un ka paang hong bengin, kei langkhatah kipawl uh hi.

¹¹Pasian in migilote tungah kei hong pia a, a kheltatte kepcip dingin hong lawnkhia hi.

¹²A nuamsa kimlai kei hong nuaizan a; ka gawlah hong manin hong nencip hi. Muitum in hong nei a;

¹³a thalkapte in kei hong umcih uh hi. Hehpih peuhmah loin ka kalte sunlet uh a, leilakah ka sinkha luangkhia hi.

¹⁴Amah in kei hong liamsuah kikkik a, galhangpa bangin kei hong ngongbawl hi.

¹⁵"Ka vuntungah puanhampi ka khui-a, ka taltang leivui lakah ka phum hi.

¹⁶Ka kahkahna-in ka mai san a, ka mitkhu bawk in ka mit a liah hi;

¹⁷tua hi napi, ka khutte ngongtat lo a, ka thungetna a siangtho hi.

¹⁸"Leitang aw, ka sisan vukcip kei in; ka kikona kikhawlsak kei tapeuh hen!

¹⁹Tu nangawn in vantungah ka teci a om hi; ka tangdingpa a sangna ah om hi.

²⁰Kei hong thumsakpa ka lawm a[29] hi-a, tua kawmkawmin Pasian tungah ka khitui ka sungkhia hi;

²¹Mi khat in a lawmpa ading a thumsak bangin mi khat tangin amah in Pasian tungah a thumsak hi.

²²"A kileh kik nawn lo dingin khual ka zin ma-in kum tawmkhat sung bek lah hong bei ding hi.