Read Zokam Job 17 Bible Online

Job 17 - Zokam bible

Job 17

¹‘Ka lungsim kitamkham a, ka nite kitomsakin hankhuk in kei hong ngak ta hi.

²Mi zahkohte in hong umcih taktak uh hi; amaute hong langneihna mitkhah loin ka en pelmawh ding hi.

³Pasian aw, nong kalh kiciamna hong pia in. Kua dangin kei adingin bitna hong piaksak ding hiam?

⁴Amaute theihtelna lungsim na khaksak hi; tua ahi ciangin amaute na gualzosak kei ding hi.

⁵Mi khat in pahtakman a deih manin a lawmte a lehbawl leh ama tate mit in khua a mu kei ding hi.

⁶"Pasian in mi khempeuh tungah thusia gentehna hong suaksak khin a; tua mite mai-ah kei hong kicilphih hi.

⁷Ka dahna hangin ka mit maang a; ka guhteng khempeuh niliap bang hi.

⁸Mi thutangte in lamdang sa uh a; a pasian-milote langah mawhpengte a ding uh hi.

⁹Tua hi taleh a thumaante in amau lampite lenkip ding uh a, amau khut siangthote a thahat toto ding hi.

¹⁰"Ahi zongin na vekun hong pai dih un, hanciam lailai un, no lakah mipil ka mu kei ding hi.

¹¹Ka nite bei ta in, ka ngimnate maimang ta a, ka lungsima ka lunggulhnate om nawn lo hi.

¹²Hih mite in zanhun sun suaksak uh a; amaute in khuamial lakah, ‘Khua vak dek ta hi’ ci uh hi.

¹³Ka inn dinga ka lamet hankhuk a[30] hi-a, khuamial lakah ka lupna phahin

¹⁴siatna kiangah, ‘Ka pa na hi hi,’ ka cih a, thante kiangah, ‘Nu aw, ahikeh sanggamnu aw,’ ka cihleh

¹⁵ka lametna koi-ah om lai hiam? Kua in kei ading lametna mu thei lai ding hiam?

¹⁶Sihna b[31] kongpite ah a paisuk diam? Leivui lakah i tuaksuk khawm diam?" a ci hi.