Read Zokam Job 18 Bible Online

Job 18 - Zokam bible

Job 18

¹Tua ciangin Shuh mi Bildad in dawng a:

²"Na paupau khawl hun nei lo ding na hiam? Khawl hun thei lecin ko kong pau thei pan ding uh hi.

³Bang hangin bawnghon bangin hong ngaihsun a, mihai banga hong seh na hi hiam?

⁴Na hehna hangin nang le nang a kibalnen na suak hi; nang tangin leitung kinusia ding ahi hiam? Ahikeh suangtumte a omna pan kilikkhia ding ahi hiam?

⁵"A gilopa’ meivak kisukmitsak hi; ama mei kuanglai mit hi.

⁶A puanbuk khuavak mial a; a kianga meivak a mit hi.

⁷A kalsuan ziauziauna kithakiasak a, ama tupnate in amah sawnpuk hi.

⁸A khe in len sungah sawnpai a, a kekna vang zongin a vak kawikawi hi.

⁹Thang in a khetul ah mana, thangkhau in gakcip hi.

¹⁰Amah siahna khaukual leitungah kisin khinkhian a, a lampi ah thang kisiah hi.

¹¹A kim a pam ah lauhuaina in amah panga, a kalsuanna citengah a sulzuih hi.

¹²Tuahsiatna in amah ngaklah a; a puk cianga a siat nading lauhuaina in amah ngak gige hi.

¹³Tua in a vun khenkhat ne mang a, sihna tacil in a khut a khete a nawmvalh hi.

¹⁴A puanbuk muanhuaina pan amah kibalzan a, lauhuaina’ kumpipa lam zuanin kipaikhiatpih hi.

¹⁵Mei in a puanbuk tenden c[32] a; a tenna tung tengah kaatkuang kitheh hi.

¹⁶A nuai-ah a thaguite keucip a, a tunga hiangte a keugaw hi.

¹⁷Amah kiphawkna leitung panin mangthang a; leitungah min a nei kei hi.

¹⁸Khuavak panin khuamial ah amah kihawlkhia a, leitung panin kidelhkhia hi.

¹⁹Ama mite lakah suan le khak ahikeh gui nei lo a, a tenna ah a khuasuak kuamah a om nawn kei hi.

²⁰Nitumna-lam mite ama hangin lauthawng uh a, nisuahna-lam mite linglawng uh hi.

²¹Migilote tenna tua bang hitakpi a; Pasian a theilote mun tua bang ahi hi," a ci hi.