Read Zokam Job 20 Bible Online

Job 20 - Zokam bible

Job 20

¹Tua ciangin Naamath mi Zophar in dawng a:

²"Ka lunghimawhnate in hong dawngsak nuam hi, bang hang hiam cih leh ka ki-ip zo nawn mahmah kei hi.

³Kei hong pahtawi loin nong taina ka za a, ka tel sinsenna in kei hong dawngsak nuam hi.

⁴"Tanglai pekpek - leitung ah mi i[41] a ki-omsak a kipan,

⁵a gilote nopsak hun a tom lam le pasian nei lote lungnop hun tomkha sung ahilam na thei taktak hi.

⁶A kiphatsakna in vantungte bana a lutang in meiite a nawkkha zongin,

⁷ama ek bangin amah a mangthang den ding hi; amah a mu ngeisate in, ‘Amah koi-ah om hiam’ ci ding uh hi.

⁸Mang bangin amah lengmang dinga, kimu kik nawn lo ding hi; zana mumang bangin maimang ding hi.

⁹Amah a mu mittang in mu kik nawn lo dinga, ama omna mun in amah a mu kik nawn kei ding hi.

¹⁰Mizawngte na a sutte a tate in loh kik pelmawh dinga; a neih a lam te ama khutin a pia kik pelmawh ding hi.

¹¹A khangmoi lai guhte a ngek lai pi mah in amah tawh leivui suakkhawm ding hi.

¹²"A kam ah gitlohna khuma, a leii nuai ah selin

¹³sekhia nuam loin a kam sungah muammuam ta leh

¹⁴a an nekte a gilpi ah a thuk suak lai dinga; ama sungah gul hangsan gu a suak ding hi.

¹⁵A valhsa a hauhnate sekhia dinga; Pasian in a gilpi zangin luakhia khinsak ding hi.

¹⁶Amah in gul gilo gu teep dinga; amah mualtan hate in a that ding hi.

¹⁷Amah in khuaizu le bawngnawi khal a luanna gun le luite a lungnoppih kei ding hi.

¹⁸Amah in a thalawhsate nek lohin pia kik pelmawh dinga; a sumbawlna-a a mette a lungnoppih kei ding hi.

¹⁹Ahang in, amah in mizawngte nengniam a, khasiat loin a nusia hi; ama lam lohpi innte a laksak hi.

²⁰"A lunggulhna bei thei lo a, a gou ding bangmah a khol thei kei hi.

²¹A khamval bangmah om lo a; a hauhna sawt a khom kei ding hi.

²²A cih theih pen hun laitakin a tungah lungdonna tung ding a; a lungkham pen hun, a tungah tung ding hi.

²³A gilpi a dip khit ciangin Pasian in ama hehna kuangin bi dinga, a tungah haksatna a zusak ding hi.

²⁴Sik galhiam panin taikhia ta leh sumngo thaltang in amah kaplet ding hi.

²⁵Amah in a sin pana a tee daldal thaltang pak a nunglam pangah a dokkhia ding hi. A tungah launa tung dinga;

²⁶khuamial bikbek in ama gou dingin a ngak hi. A kizaap lo mei in amah kangtum dinga a buk sunga a om laite haltum ding hi.

²⁷Vantungte in ama khialhna pholak ding a; ama lang khatah leitung in a do ding hi.

²⁸Tuikhang in a inn taimang dinga, Pasian thangpaihna ni-in tuizeute a[42] in a taimang ding hi.

²⁹Tuate pen Pasian in migilote ngah dinga a sehsa ahi hi," a ci hi.