Read Zokam Job 21 Bible Online

Job 21 - Zokam bible

Job 21

¹Tua ciangin Job in dawng a:

²"Ka kammalte limtakin ngai un; hih pen kei nong hehnepna uh hisak un.

³Ka gen laitak na thuak keikai unla, ka pau khit ciangin hong zahpih pan un.

⁴"Kei mawhsakna mihing khat tung ahi hiam? Bang hangin lungtom lo ding ka hi hiam?

⁵Kei hong en unla, lamdang sa un; na khut pekun na kam uh hum un.

⁶Hih thu ka ngaihsut ciangin kei hong lausak a, hong pumlinsak hi.

⁷Bang hangin migilote nungtata lai-in khansau-a vanglian lailai uh ahi hiam?

⁸Amaute in a kim a pam-ua a tate uh a khantoh lam mu uh a, a suan a khakte uh a mitun mu uh hi.

⁹A innte uh muanhuai-a launa a om kei hi; amaute in Pasian cianggolh a thuak kha kei uh hi.

¹⁰A bawngtalte uh lanlo ngei lo a; a bawngpite un no nei denin tolh ngei lo hi.

¹¹Amaute in a tate uh tuuhon bangin sawlkhia uh a; a tanote uh lam uh hi.

¹²Amaute in khuangta le harp tumin la sa uh a; tamngai aw tawh nuam sa uh hi.

¹³A nuntak sung uh cihtheihna-in zang uh a, a sih uh ciangin lungnuam b[43]takin han c[44] a zuan uh hi.

¹⁴Tua hi napi, Pasian tungah, ‘Ko hong nawngkaisak kei in! Na lampi thei nuam kei ung.

¹⁵A na ka sep dingun a Thahatpa kua ahi hiam? Ama tungah thu ngen le ung bang ngah ding ka hi uh hiam?’ci uh hi.

¹⁶Ahi hangin amau cihtheihna amau khutah om lo hi; tua ahi ciangin migilote ngaihsutna le kei aa kigamla hi.

¹⁷"Tua hi napi migilopa’ meivak bangzah vei mit ta ahi hiam? Amaute tungah tuahsiatna bangzah vei tung ta a, Pasian in ama hehna bangzah vei tuaksak ta hiam?

¹⁸Amaute bangzah vei huih mutleng buhtu bang a, huihpi in a letmang buhsi bang uh ahi hiam?

¹⁹‘Pasian in mi khat thuak ding, a tapate ading a kholsak hi,’ kici hi. Amah in a theih nadingin ama tung mah ah kithuk pah hen!

²⁰Ama siatna ama mit mah in mu pah hen; Thahatpenpa thangpaihna amah kidawnsak pah hen. a[45]

²¹Ahang in, a kiciangtansaksa zahkhate a bei khit cianga a nusiat a innkuanpihte bang awlmawh nawn ahi hiam?

²²"A sangpen thu nangawn a khen khit nungsang, mi khatpeuh in Pasian tungah pilna hilh thei ahi hiam?

²³Mi khat a thahat pen laitakin si a, lungmuangtakin a tawlnga hi;

²⁴a pumpi b[46] sadim phitphet a, a guhte in guhtui a hau hi.

²⁵Midang khat khakham veisapi in si a, hoih a kici khat beek a sinkha ngei kei hi.

²⁶Amaute a kibangin leivui lakah lumtuak uh a, than in pumtuam tuak hi.

²⁷"Kei nong khialhsak nadingun na tupna uh, na ngaihsutnate uh hoihtakin ka thei khin hi.

²⁸Note in, ‘Tu in miliante inn koi-ah om a, migilote tenna puanbuk koi-ah om ahi hiam?’ na ci uh hi.

²⁹Khualzin mite dong ngei lo na hi uh hiam? amau hong gen - tuahsiat hun ciangin migilote peng zawsop a,

³⁰thangpaihna hun panin c[47] amah kihukhia hi, ci-a hong gente uh thusim lo na hi uh hiam?

³¹Kua in a mai-ah a gamtatna va langgen ahi hiam? a gamtatsa a thuk kik kua ahi hiam?

³²Amah han lamah kipua a, a hankhuk kicingsak hi.

³³Mualkuam a leihoih ama adingin khum a; mi khempeuh in amah zui-in, ama mai-ah simzawh loh mihonpi pai khin d[48] hi.

³⁴"Tua ahi ciangin thu gina lo peuhin kei hong hehnem zo ding na hi uh hiam? Zuauthu longal nong dawn nading uh bangmah om nawn lo hi," a ci hi.