Read Zokam Job 22 Bible Online

Job 22 - Zokam bible

Job 22

¹Tua ciangin Teman mi Eliphaz in dawng a:

²"Mi khat in Pasian phatuamsak thei ahi hiam? Mipil khat nangawn in amah phatuamsak thei ahi hiam?

³Note thumaanna in Thahatpenpa tungah bang phatuamsak ahi hiam? Na nuntakna paubaang kei leh amah in bang lawhtak ahi hiam?

⁴"Na biakna-mina dingin amah in nang hong tai a, nang hong thuaksak sa na hi hiam?

⁵Na gitlohna a liat hang hi lo ahi hiam? Na mawhnate a bei theih loh hang hi lo ahi hiam?

⁶A thu om lopi in na sanggampa tung panin kiciamna na mawk nget a; mi puan hawkkhiatsakin a guaktangin na nusia hi.

⁷A gimte tui pia loin gilkialte an na pia kei a

⁸nang leitang a teng mi vanglian- mi zahtak khat hi napi tuate na dek tentan hi.

⁹Meigongte khutguakin na hawlkhia a, pa nei lote hatna na sutan hi.

¹⁰Tua hangin na kimkotah thang hong kisiah a, tua hang mahin launa lianpi in thakhatin nang hong phawng a,

¹¹tua hang mahin na muh theih lohin khua mialvat a, tua hang mahin tuikhang in nang hong tuum hi.

¹²"Vantung a sannate ah Pasian om hi lo ahi hiam? En dih ve, aksi sangpente nak san na lawmlawm e!

¹³Tua hi napi, ‘Pasian in bang thei hiam? Tua zaha khuamial lakah thu khen thei ding hiam?

¹⁴Amah meii sahpi in tuamcip hi, tua ahi ciangin vante khumzangah a pai kawmin eite hong mu thei lo ding hi,’ na ci lai hi.

¹⁵Migilote totsa lampi lui mah tawn lai na hi hiam?

¹⁶Amau hun a cin ma-in amaute kipuamang hi; amau bulkipte tuikhang in nawtmang hi.

¹⁷Amaute in Pasian kiangah, ‘Ko hong nawngkaisak kei in! A Thahatpenpa in ko tungah bang hih thei hiam?’ ci uh hi.

¹⁸Tua a cihpa uh, na hoih tawh amaute inn a dimsakpa hi lai hi, tua ahi ciangin migilote ngaihsutna le kei aa kigamla hi.

¹⁹"A thumaante in amaute siatna a muh uh ciangin lungdam uh hi; a mawhpengte in amaute zahpihin,

²⁰‘I galte kisia takpi a a hauhna teng uh mei in kangtum khin hi,’ ci uh hi.

²¹"Pasian tung ki-ap lel inla, amah tawh kilem in; hi bang lamin na daupai zaw ding hi.

²²A kama hong lamlahna mang inla na lungsim sungah ama kammalte kemcing in.

²³A Thahatpa lamah na kihei kik leh na ngeina hong bangsak ding hi. Na puanbuk pan gamlapi ah gitlohna na paihmang a,

²⁴na khamvuite leivui-in ngaihsunin, na Ophir khamte gun suangtum bangin ngaihsun lel lecin,

²⁵tua ciangin a Thahatpenpa na kham hong hi dinga, na ngun deih pen hong hi ding hi.

²⁶Tua ciangin Thahatpenpa sungah nuam na sa taktak dinga, Pasian lamah na dakto ding hi.

²⁷Ama tungah thu na ngen dinga, amah in hong za ding hi; tuateh na kiciamna na tangtun ding hi.

²⁸Na lungsim khentatna kitangtungsak dinga, na lampi ah khuavak a tang ding hi.

²⁹Mite in mi a niamsak ciangin, ‘Amaute phong to un!’ na ci a, tua ciangin amah in a tukpa a honkhia ding hi.

³⁰Amah in mawhpeng lo pa khat nangawn hukhia dinga, na khut sianthona hanga amah a kihonkhia hi ding hi," a ci hi.