Read Zokam Job 27 Bible Online

Job 27 - Zokam bible

Job 27

¹Tuateh Job in a thugen zomlai-a:

²"Ka thutanna a nialpa Pasian, kha khamveina hong ciamsak a Thahatpenpa’ a nuntakna lo in,

³ka sungah nuntakna ka neih laisiah Pasian huu ka nakin ka dik laisiah

⁴ka muk in gitlohna a gen kei ding a, ka leii in zuauthu a genkhia kei ding hi.

⁵Note a maanin kong sang ngei kei ding a; ka sih dongin ka cihtakna ka khah kei ding hi.

⁶Ka thumaanna ka len cinten ding a, ka khah ngei kei ding hi; ka lungsim in ka nuntak laisiah hong mawhsak kei ding hi.

⁷"Ka galte migilote bang henla, kei hong dote thutang lote bang uh hen!

⁸Pasian in a nuntakna a laksak khit ciang, amah a kikhenkhiat khit ciangin pasian nei lote adingin bang lametna om lai ahi hiam?

⁹Lungdonna a tuah ciangin a kikona Pasian in ngai ahi hiam?

¹⁰Thahatpenpa’ kiangah nopsakna a mu ding hiam? Hun khempeuh ah Pasian a sam ding hiam?

¹¹"Pasian vangliatna kong hilh ding hi; Thahatpenpa lampi ka imkei ding hi.

¹²Note in a vekin na mu khin uh hi. Tua ahileh bang hangin khiatna nei lopi kampau na hi uh hiam?

¹³"Hih lai-ah Pasian in migilote a piaktuam, a ngongtatte in Thahatpenpa tung pana a luah uh a om hi.

¹⁴A tate tam taleh amau lawhtak namsau ahi hi; a suan a khakte in an khamkhop a nei kei ding uh hi.

¹⁵A nungtasunte pulpi-in kivui dinga, a meigongte un a kah kei ding uh hi.

¹⁶Amah in ngunte leivui bangin a khol venvan a, buan bangin puansilh a cian venvan hangin

¹⁷a khol venvan teng thumaante in silh ding uh a, mawhpengte in ama ngunte a hawm ding uh hi.

¹⁸A inn lamte lungbu bangin, bukkhel tawh kibang lel ding hi.

¹⁹Amah a hausa-in luma a ban a zom nawn kei hi; a mit hak kik a, na bei khinta hi.

²⁰Tuikhang bangin launa in amah tuamcip a, zanin huihpi in a mutmang hi.

²¹Nisuahna huih in amah puakhia a, a beimang hi; a omna mun panin phiatkhiamang hi.

²²A vangliatna pan luhumsa in a tai kawmkawm mah lainat loin amah munkhat a denna ding hi.

²³Tua in khut betsan in zahnuihsan dinga, a omna mun pan a mutkhia ding hi.