Read Zokam Job 28 Bible Online

Job 28 - Zokam bible

Job 28

¹"Ngun kitawhna khuk khat om in, kham siansakna mun khat om hi.

²Lei panin sik a kilakhia hi-a, sumsan suang panin sumsan a kihaltui ahi hi.

³Mihing in khuamial beisak a, a mial penna muna sumsan suang zongin a gamla pen mun dong a ban hi.

⁴Mite tenna mun pan gamlapi-ah leisung tolet a, mihing khe tun lohna mihing pan gamlapi ah khai linglengin a kivei hi.

⁵An piankhiatna leitang a nuai pana mei-a hal bangin kikhel a;

⁶a suangte panin sapphire a[57] piang khia a, a suangvui lakah khamvui a kihel hi.

⁷Vasa ahikeh sasialnete in tua kawmbu zawi thei lo uh a, simbung in zong tua mun a mu nai kei hi.

⁸Gamsa kisatheite in sikkha nai lo uh a, humpinelkai zong a thamvak kha nai kei hi.

⁹Mihing khutin meisah suangte to-a, mualpi bulte a tomang hi.

¹⁰Amah in suangtumpi tovang a; a mitin goute khempeuh a mu hi.

¹¹Gun nakte zong b[58] kawikawi a, a kisel nate a lakhia hi.

¹²"Ahi hangin pilna koi lai-ah kimu ding ahi hiam, theihtelna koi lai-ah teng ahi hiam?

¹³Mihing in a manphatna sehkhia zo lo a; nuntakna neite gamah a kimu thei kei hi.

¹⁴Tui thukna in, ‘Kei tawh om kei’ ci a; tuipi in, ‘ko tawh om lo hi’ ci hi.

¹⁵Kham hoih penpenin kilei thei lo a, ngunin zong a man ding kiteh thei lo hi.

¹⁶Ophir khamin kilei thei lo a, a manpha onyx ahikeh sapphire in zong a kilei thei kei hi.

¹⁷Kham ahi a crystal tawh ahi zongin kitehkak thei lo a, kham tawh kibawl suang manpha in zong a kikhek thei kei hi.

¹⁸Coral le jasper bel gen tham vet lo hi; pilna man ahileh ruby-te sangin manpha zaw tham hi.

¹⁹Cush pana topaz tawh tehkak theih hi lo a, kham citak in zong a kilei thei kei hi.

²⁰Tua ahileh pilna koi pan hong pai ahi hiam? Theihtelna koi-ah teng ahi hiam?

²¹"A nungta na peuhmah’ mit ah kisel a, huih lak vasate pan nangawn ah kisincip hi.

²²Siatna c[59] le Sihna in, ‘Kam lengsawn bekin ama thu ka za uh hi,’ ci uh hi.

²³Pasian in pilna lampi theitel a, a tenna mun amah bek in thei hi,

²⁴ahang in, amah in leimong dong mu a, vantungte nuai-a na khempeuh a mu hi.

²⁵Amah in huih hatna a bawl lai, tuite a teh lai,

²⁶guahtui a ding thukip a bawl lai, vanging - khuaphia ading lampi a sial lai-in,

²⁷pilna enin aman seh a, kipsak in a sin hi.

²⁸Tuateh mihing kiangah, ‘Topa kihtakna - tua in pilna hi a, gitlohna pelhna in theihtelna hi,’ ci hi," a ci hi.