Read Zokam Job 29 Bible Online

Job 29 - Zokam bible

Job 29

¹Job in a thugen zom lai a:

²"A beisa khate ngai mah si’ng, Pasian in kei hong cin lai nite ngai si’ng,

³ka lutungah a meivakte a tan lai in khuamial sungah ama khuavakin kei ka pai hi.

⁴Oh, ka hun hoih pen nite lah ahi a, Pasian tawh kinai-in ka innkuan thupha hong piak lai,

⁵Thahatpenpa kei tawh a omkhawm lai, ka tate ka kimkot ah a om lai,

⁶ka lampi bawngnawi khalin kawt a, suangtum in kei ading olive thau hong sukkhiatsak lai hi.

⁷"Khuapi kongpi ah pai-in mihon omna munah ka tut ciangin,

⁸khangnote in kei hong mu in hong awn uh a, khanghamte na ding uh hi;

⁹khua sung uliante a pau kimlai khawl uh a, a khut un a kam uh a hum uh hi;

¹⁰Mi thupite sippah dide uh a, a leii uh a dangtung uah a belh hi.

¹¹Ka thugen a za peuhmah in kamkhumin za uh a, hong mu peuhpeuh in hong phat uh hi;

¹²bang hang hiam cih leh ka huh ding hong ngen mizawngte ka hu a, a huh ding om lo pa nei lote ka huh hi.

¹³A sikuan mite in thupha hong pia uh a; meigongte ka lung nuamsak hi.

¹⁴Puan bangin thumaanna ka silh a, thutangna ka puantualpi le ka dial saupi ahi hi.

¹⁵Mittawte tungah mit ka hi-a, khebaite tungah khe ka hi hi.

¹⁶A tasamte tungah pa ka hi a, ka theihloh mite thu ka vaihawmsak hi.

¹⁷Migilote ui-ha ka sutan a, a maute’ ha panin a thuakpa ka botkhia hi.

¹⁸"‘Kei neihsa inn ah ka si dinga, ka nuntak sung nite sehnel tang zahin a tam ding hi;

¹⁹Ka zungte in tui omna ban dinga, ka hiangte ah zan tawntung daitui a kai ding hi.

²⁰Ka minthanna ka sungah thaksuak den dinga, ka khut sunga thalpeu a thak tawntung ding hi,’ ci-in ka ngaihsun hi.

²¹"Mite in lametna tak tawh ka thugen ngai uh a, ka kuppih ding ngakin a dai khipkhep uh hi.

²²Kei ka pau khit ciangin amaute pau nawn lo uh hi; amaute bil ah ka thugente aw khumin a lut hi.

²³Amaute in khuapi-guah ngak bangin kei hong ngak uh a, guah masa bangin ka thugente a dawn uh hi.

²⁴Nuih mai-in amaute ka et ciangin, um taktak ngam lo phial uh hi; amaute a[60] tungah ka maitaina a manpha hi.

²⁵Amaute ukpi bangin ka tu a, a lampi ding uh ka telsak hi; galkap hon laka kumpipa bangin ka teng a; a thumte a hehnempa khat ka bang hi.