Read Zokam Job 31 Bible Online

Job 31 - Zokam bible

Job 31

¹"Lunggulh luatna tawh nungakno khat en lo dingin ka mit tawh thukhun ka bawl hi.

²Tunga Pasian panin mihing in bang ngah a, a sangna-a Thahatpenpa panin amah in a luah bang ahi hiam?

³Migilote aa in kisiatna, amaan lo-a gamtate aa in tuahsiatna hi lo ahi hiam?

⁴Ka lampite mu loin ka kalsuan simin sim lo ahi hiam?

⁵"A khial lamin ka kalsuan a, zuauphuak dingin ka nawh kalsuan leh -

⁶Pasian in kei amaan tawikhaina-in hong teh ta hen. Ka paubaan loh lam hong thei dinga,

⁷lampialin ka kalsuan leh ka lungtang in ka mit a zuih leh a, ahikeh ka khutte buah a ban khit leh

⁸ka vawhsa midang in ne henla, ka ankungte kibulkalh ta hen.

⁹"Numei khat in ka lungsim a zol zawh a, ka vengte kongah ka buksim leh

¹⁰ka zi in midang khat an gawi henla, pasal dangte in amah luppih hen.

¹¹Ahang in mawhna khat thu a kikhen ding zumhuai hi.

¹²Siatna a[66] donga a kangtumsak mei hi a; tua in ka anlak ding teng botkhia ding hi.

¹³"Ka nasem numeite le ka nasem pasalte in kei tungah lung kimlohna khatpeuh a neih uh ciangin thutan’na ka nial leh,

¹⁴Pasian in kei hong maituah ciangin bang ka hih ding hiam? Thu dot dinga hong sap ciangin bangin ka dawng ding hiam?

¹⁵Sul sunga kei hong bawlpa in amaute sul sungah bawl hi lo ahi hiam? nute sungah khat mahin hong bawl tuak hi lo ahi hiam?

¹⁶"Mizawngte deihna ka nial a, ahikeh meigongte mit ka nguisak leh

¹⁷ka anlum kei guak in ka kepa, pa nei lote hawm loin -

¹⁸ka neu lai-a kipan pa bangin ka kep kei leh, ka suah a kipan meigongte ka makaih kei leh -

¹⁹puansilh nei lo, a kisia ding mi khat ka muh a ahikeh a tasampa puantual lo a ka muh leh,

²⁰a lungsimin kei thupha hong piak zah in ka tuumul in a khua a lumsak kei leh,

²¹zumah thuzawh khin cih thei kawmin pa nei lote langkhatah ka khut ka lap leh,

²²tua ciangin ka liangko pan ka ban kiakhia henla, a guhlawi pan kitankhia hen.

²³Ahang in, Pasian pana kisiatna ka kihta a, ama thupina ka kihtak manin tua bang na ka sem thei kei hi.

²⁴"Muan penin kham ka neih a, ahikeh kham citak kiangah, ‘Ka ngaihmuanna nang na hi hi,’ ka cih leh

²⁵ka hauh mahmahna le ka khut a ka ngah ding hauhna ah ka lungnop leh

²⁶hoihtaka tang ni ahikeh thupi taka kihei khapi ka thupisim a,

²⁷a simthamin ka lungsim hong kizola ka khut in amaute tung tokaina’ napna a piak leh

²⁸tua ciangin a sangna-a Pasian tungah ka muanhuai lohna hi khin ahi manin, hihte zong thukhen ding mawhnate mah ahi hi.

²⁹"Ka galte a daupai loh ciangin ka lung dama, ama tunga tung lungkhamna hangin ka kigualzawhsaka

³⁰ama nuntakna a hamsiat nadingin ka kam ka phal kei a -

³¹ka innkuanpihte in, ‘Job sa a gilvah lo kua om ding hiam?’ a cih ngei kei uh leh -

³²ahi hangin mikhual khat beek zanin lamdungah a lum kei uh hi, ahang in, khualzinte ka kong ka hon den hi -

³³mite a[67] hih bangin ka mawhna ka ipcip a, ka khialhna ka lungsim tawngah selin

³⁴mihonte ka kihtak hang le ka behte simmawh ding ka lau manin daitakin om a, inn pua-ah ka paikhiat kei leh -

³⁵("Oh, ka thu hong za khat na om veve na ve! ka kihutna ka min ka thuh hi - Thahatpenpa in hong dawng ta hen; hong mawhsakpa in ka thupalsatna lai-in gelh ta hen.

³⁶Hi taktak hi, ka liangko ah ka suang dinga, kumpi lukhu bangin ka khu ding hi.

³⁷Ka kalsuan sima ka gamtatna ka gen dinga; kumpi tapa bangin ama lam ka manawh ding hi.) -

³⁸Kei langah ka leitang kapin tumakuakte khitui in a kawt leh

³⁹sum pia loin a gahte ka nek a ahikeh a lo neipa ka khasiatsak leh

⁴⁰tua ciangin mangbuh tangin lingkung hong po henla, mangbuh-ham tangin tahum hong po hen," a ci hi. Job thugen a bei ta hi.