Read Zokam Job 34 Bible Online

Job 34 - Zokam bible

Job 34

¹Tua ciangin Elihu in:

²"No mipilte aw, ka thugen ngai un; no theihna neite aw, na ngai dih un.

³Leii in an limna a theih bangin bil in kammal sittel hi.

⁴A thumaan bang hiam cih ei le ei kisittel ciat dih ni; a hoih bang hiam cih sinkhawm dih ni.

⁵"Job in, ‘Mawhpeng ka hi hi; ahi hangin Pasian in ka thutan’na hong nial hi.

⁶Kei amaan ka hi hangin azuau in hong kingaihsun hi, khialhna nei lo ka hi hangin a thaltang in a dam thei lo liamna hong thuaksak hi,’ ci hi.

⁷Job bang mihing kua om a, kua in simmawhna tui bangin dawn ahi hiam?

⁸Amah migilote tawh kikhawl den hi; mi kheltatte tawh kipawlkhawm hi.

⁹Ahang in, ‘Mi in Pasian a lungkimsak ding a hanciam ciangin bangmah a met kei hi,’ci hi.

¹⁰"Tua ahi ciangin no a theitel mite aw na ngai dih un, Pasian le gitlohna kigamla henla, Thahatpenpa le khialhna kigamla ta hen.

¹¹Mihing a sepna bangin amah in thuk kik a, a gamtatna tawh kizui-in a tungah tungsak hi.

¹²Pasian in khialhna a bawl ding kingaihsun thei lo a; Thahatpenpa in thumaan a lehhei ding kingaihsun thei lo hi.

¹³Amah leitung uk dingin kua in za pia ahi hiam? Amah leitung buppi kem dingin kua in koih ahi hiam?

¹⁴Tuate ama bawlsa ahileh a kha le a huu a[79] dok kiksawm leh

¹⁵mihing khempeuh mangkhawm dinga, mihing leivui-ah ciah kik ding hi.

¹⁶"Theihtel theihna na neih leh hih thu za inla; ka gen bang hiam ngai in.

¹⁷Thutang a mudah kua in gam uk ding ahi hiam? Thumaan le Thahatpenpa mawhpaih ding na hi hiam?

¹⁸Kumpite kiangah, ‘Kimanna na nei kei uh hi,’ ci-in, uliante kiang ah migilo na hi uh hi, a ci Pa amah hi lo ahi hiam?

¹⁹Amaute khempeuh a khuta a bawl ahi manin kumpi tapate khentuam loin mizawngte sangin mihaute a angvan tuan lo pa, amah hi lo ahi hiam?

²⁰Amaute thakhat thu-in zan kim laitakin si uh hi; mite lingin simang uh hi; mihing khut hepkhiat lohin mi thahatte kihemkhia hi.

²¹"Ama mitte in mihingte lampi en gige a, amau kalsuanna khempeuh a mu hi.

²²Migilote buk nadingin khuamialna mun le ni liap thukpi om lo hi.

²³Pasian in mihingte a sittel beh lai ding kisam lo a, thu kikhen dingin a mai-ah pai ding kisam lo hi.

²⁴A thu kan kul loin a thahatte sucip a, ama mun adangte luahsak hi.

²⁵Bang hang hiam cih leh amau sepnate ciamteh a, zanin amaute lawnthalin kitamzan uh hi.

²⁶Amah in amaute gitlohna hangin mi khempeuh muhna ah dan tuaksak hi,

²⁷bang hang hiam cih leh amaute in lam pialsan uh a, ama lampite khat beek a thusim kei uh hi.

²⁸Amah in a tasamte kahna a zak theih nadingin, mizawngte kahna ama mai-ah tungsak hi.

²⁹Ahi hangin amah in bangmah hih ta kei leh kua in amah mawhpaih thei ding hiam? A maitang sel leh amah kua in mu thei ding ahi hiam?

³⁰Tua hi napi amah in pasian nei lote a ukna le mite kithangsiahna panin mi khat le minam khat a kibangin a kem hi.

³¹"Mi khat in Pasian kiangah, ‘Ka khial hi, ahi zongin ka khial nawn kei ding hi.

³²Ka muh theihlohte hong hilh in; ka khialhnasa a om leh zong tuate ka hih nawn kei ding hi,’ ci leh

³³kisik ding na nial ciangin Pasian in hong pakta ding sa na hiam? Kei khentat ding a hi kei hi, nang khentat pelmawh ding ahi hi; tua ahi ciangin nang theihna hong gen dih in.

³⁴"Thu theitel mite, ka thugen a za mipilte in kei kiangah,

³⁵‘Cimna nei loin Job kampau hi; a kammalte thumal nei a om kei hi,’ hong ci ding uh hi.

³⁶Oh, Job in mi tatsiate banga a dawn kikna hangin a tawpna dong kizia-et leh ut sing!

³⁷Ama mawhna banah a langdo lailai hi; a mi zahpihna-in eite lakah a khut benga, ‘Pasian a langpanna kammal a behlap thuah lai hi," a ci hi.