Read Zokam Job 39 Bible Online

Job 39 - Zokam bible

Job 39

¹"Mualtung sathakte a suah hun thei na hi hiam? Sanangpite a no a suah ciangin va vil na hi hiam?

²A paii sung kha phazah sim na hi hiam? A suah hun uh thei na hi hiam?

³Amaute opsakin a no a suak uh hi; tasuah natna a thuak kha nawn kei uh hi.

⁴A note uh khanpha in, gam sungah hat uh hi; a pite nusia uh a, zuan kik nawn lo uh hi.

⁵"Gamsung laate kua in khah ahi hiam? A khau kua in sut ahi hiam?

⁶Ama inn dingin gamtak lak ka pia-a, a ten nadingun sih omna zangte ka pia hi.

⁷Khuasung gamlumna nuihsan bek a, leeng hawlte otna a za kei hi.

⁸Mualno dungte ah gamta a, singhing lohing a zong hi.

⁹"Gam bawngtalte in nang na sem nuam ahi hiam? Zanin na gan-ankuang gei-ah giak nuam ding hiam?

¹⁰Lokalhna ah gam bawngtal a khau-in kai zo na hi hiam? Na nungah mualkuamte kho ding ahi hiam?

¹¹A hat luatna hangin a tungah na kinga ngam ding hiam? Na nasep haksa amah na nusiat ding hiam?

¹²Na antang pua in an cilna phualah a khawm dingin na muang thei diam?

¹³"Kala-oh vasate in a khate nuamtakin zaap hiathiat uh hi, ahi hangin tui vapi khate le a khavengte tawh kitehkak thei lo hi.

¹⁴A pite leitungah tui uh a, sehnel lakah lumsakin

¹⁵khe khatpeuh in tuate a sikkhak ding le gamsate in a tuatkhak ding ngaihsun lo uh hi.

¹⁶Ama aa ahi lo bangin a note ngong khoi a; a sepna a mawkna-a hih na a awlmawh kei hi.

¹⁷ahang in, Pasian in pilna guan loin ahikeh ngaihsut-siamna a pia kei hi.

¹⁸Tua hi napi tai dinga a khavengte a zaak ciangin sakol le a tunga tuangpa a nuihsan bek hi.

¹⁹"Sakol hatna nang piaksa sa a, ahikeh a ngawngmul nang posak sa na hi hiam?

²⁰Nang in kauphe bangin tuansak a, a lauhuai dingin phitsak na hi hiam?

²¹Amah in nakpipi in lei khuat a, a hatna suangin gal sungah dianggawp hi.

²²Launa nuihsan bek a, bangmah a kihta kei hi; namsau mai-ah a dual tuan kei hi.

²³Thaltang bawm, atee zialzial teipi le tulzum in a pang sat lengleng hi.

²⁴Lauthawng kawm le lawp lua-in leitang ne a, pengkul a kimut ciangin a omkhong thei kei hi.

²⁵Pengkul a kimut nak leh phit in a ham hi. Amah in gamlapi panin gal gimnam za a, galkap mangpa otna le gal awging thei hi.

²⁶"Nang pilna hangin simbu lengin leitaw lamah a kha zal ahi hiam?

²⁷Nang thupiakna mangin muvanlai sanglen a, a sangpi ah bu tom ahi hiam?

²⁸Amah kenbangah teng a, zan ciangin tua lai-ah a giak hi; ama kulh muanhuai suang hengkawm ahi hi.

²⁹Tua lai pan an zong dingin kuankhia a, a gamlapi panin a mitin mukhia thei hi.

³⁰A note sisanin kivak uh a, ganhing kithahna munah amah a om hi," a ci hi.