Read Zokam Job 4 Bible Online

Job 4 - Zokam bible

Job 4

¹Tua ciangin Teman mi Eliphaz in dawng a:

²"Mi khatpeuh in hong hopih le ung na thuak ngap hiam? Ahi zongin kua ki-ip zo mawk ding hiam?

³Mi tampi na lamlahnate khutkha bankhate na thakhauhsaknate ngaihsun dih in.

⁴Na thugente in a muktute phong a, khuk zawte na thakhauhsak hi.

⁵Ahi zongin tu-in nang tungah gimna hong tunga, na lungkia hi; tuate in nang hong su a, na lungmang hi.

⁶Na biakna-mina pen, na ngaihmuanna, na paubaan lohna, na lametna hi lo ding ahi hiam?

⁷"Tu-in ngaihsun in: Mawhpeng kimlai kua sia ngei ahi hiam? A thutang kimlai kua kisusia ngei hiam?

⁸Gitlohna lo-a khote le buaina a vawhte in tuate mah a at lam ka thei hi.

⁹Pasian husan-in amaute kisia uh hi. A hehna mutin a mangthang uh hi.

¹⁰Humpinelkaite thamvakin hawk thei ta leh, humpinelkai lianpite ha zong kitan zo hi.

¹¹Sa mat ding nei loin humpinelkaite mangthang a, humpinelkai note a kithehthang uh hi.

¹²"Kei tungah thu khat hong kitun sim a, tua hong kihuau ka bilin ka za hi.

¹³‘Zankim laitak, mite ihsip hunin lungsim patauhna mangte manin,

¹⁴launa le linna in kei hong mancip-a, ka guh khempeuh a lingsak hi.

¹⁵Kha khat in ka mai hong mut hiauhiau a, ka khuasik mul suak hi.

¹⁶Tawpta napi, bang hiam ka gen thei kei hi. Milim bang khat ka mai-ah hong dinga, hong huau khiankhian aw khat ka za hi.

¹⁷Pasian sangin mihing thumaanzaw thei ding ahi hiam? Mi khat amah Bawlpa sangin siangzaw thei ding ahi hiam?

¹⁸Pasian in a nasemte muang lo a, a vansawltakte mawhsak ahileh,

¹⁹buan inn sunga tengte leivui laka khuambul phutte nget nek sanga siazaw a bawlte nak mawhsak zaw lo ding ahi hiam?

²⁰Phalvak le khuamui kikalin amaute kitamzan uh hi; a kiphawkkha loin mangthang suak uh hi,

²¹Amaute pilna lo tawh a sih nadingun a puanbuk khau uh kikai to hi lo ahi hiam?’ a[8] hong ci hi.