Read Zokam Job 40 Bible Online

Job 40 - Zokam bible

Job 40

¹TOPA in Job kiangah:

²"Thahatpenpa a mawhsak mipa in amah bawlpha ding ahi hiam? Pasian mawhsakpa in amah dawng hen!" a ci hi.

³Tua ciangin Job in TOPA dawng a:

⁴"Ka cin zo kei hi - bang hong ci dawn thei ding ka hi hiam? Ka kam ka hucip ding hi.

⁵Khatvei ka pau khin a, dawn nading om lopi ahi hi - nihvei ka pau hangin bangmah ka gen nawn kei ding hi," a ci hi.

⁶Tua ciangin huihpi lakah TOPA in Job dawng a:

⁷"Kipasalsak inla, na kawng gak in; thu kong dong dinga nong dawng ding hi.

⁸"Ka thutan’na bangmah lo suaksak na hi hiam? Nang a thutang na kisuahsak nadingin kei hong mawhpaih na hi hiam?

⁹Nang in Pasian’ ban bang ban nei in, ama aa bangin na aw in van gingsak thei ahi hiam?

¹⁰Tua ahileh minthanna le thupina tawh nang le nang kizem inla, pahtawina le zahtakna kisilhsak dih in.

¹¹Na thangpaihna suahkhia inla a kiphasakte enin niamkhiat gawp dih in,

¹²A kiphasak peuhmah en inla, amah niamkhiatin a gilote a dinna munah tuancil dih in.

¹³Amaute leivui tawh vuikhawm inla; hankhuk ah a mai uh vukcip in.

¹⁴Tua ciangin na khut taklam in nang hong hon zo hi, ci-in ka taksang ding hi.

¹⁵"Bawngtal banga lopa a ne nang tawh kong bawlkhawm behemoth a[101] ngaihsun dih in.

¹⁶A kawngguh ah bang hatna nei-in a gilpi ah bang sagolh vangliatna nei ahi hiam?

¹⁷Taamtak bangin a mei b[102] pek a, a phei sagolhte gaktakin kiphan hi.

¹⁸A guhte sumngo sungvang banga, akhut akhete siktawn bang hi.

¹⁹Pasian sepsate lakah a tuam pian pen hi napi amah a bawlpa in, a namsau-in a zo hi.

²⁰Mualte in amau pana piangte amah puak a, gamsate khempeuh a kiangah kimawl uh hi.

²¹Tui-unok kung nuai-ah lum a, nawng sung pumpeng lakah a bu hi.

²²Tui-unok kungte in a liim in sel a, lui gei-a gialhek kungte in umcih hi.

²³Tui a khangawp hangin a patau kei hi. Jordan khang in a kam ciang nawk ta leh ngaihmuang lai hi.

²⁴Kua in a sikkawi-in c[103] man zo a, thang siahin a nak pheh zo ding ahi hiam?