Read Zokam Job 42 Bible Online

Job 42 - Zokam bible

Job 42

¹Tua ciangin Job in TOPA dawng a:

²"Na khempeuh na hih theih lam ka thei hi; na geelna kuama dal theih hi lo hi.

³‘Pilna loin kua in ka thuhilhna sel ahi hiam?’ ci-in nong dong hi. Kei theih dingin a lamdang lua mahmah ka theihtel loh nate ka genkhia khin takpi hi.

⁴"Tu-in kong gen ding hi, na ngai in; ken kong dong dinga, nang nong dawng ding hi,’ nong ci hi.

⁵Na thugen ka bilin ka za a, ahi hangin tu-in ka mitin nang kong mu khin hi.

⁶Tua ahi ciangin kei le kei ka kisimmawh a, kisikin vut le vai ka khu hi," ci hi.

⁷TOPA in Job tungah hih teng a gen khit ciangin Teman mi Eliphaz tungah, "Nang le na lawmte gel tungah ka heh hi; bang hang hiam cih leh note in ka nasempa Job bangin kei thu amaanin na gen kei uh hi.

⁸Tua ahi ciangin bawngtal sagih le tuutal sagih kengin ka nasempa Job kiangah pai unla no mahmah in meihal biakna na bawl un. Ka nasempa Job in thu hong ngetsak leh ama thungetna ka sang dinga, note haina zahin kong thuaksak kei ding hi. Note in ka nasempa Job bangin kei thu amaanin na gen kei uh hi," a ci hi.

⁹Tua ahi ciangin Teman mi Eliphaz, Shuh mi Bildad le Naamath mi Zophar-te in TOPA gen bangin hih uh a; tuateh Job thungetna TOPA in a sang hi.

¹⁰Job in a lawmte ading thu a ngetsak khit ciangin TOPA in amah citheisak kik a, tua ma-a a neihzah nih a pia hi.

¹¹A sanggamnu a sanggampate le amah a theisate khempeuh pai uh a, a inn ah an a ne uh hi. Amaute in TOPA in ama tunga a tunsak lungkhamnate hangin hehnemin gen pihpih uh a, ngun a[106] peek khat le kham zungbuh khat ciat a pia uh hi.

¹²TOPA in Job nuntak hun a masa lam sangin a nunung lamah thupha a pia zaw hi. Amah in tuu tulsawm le tulli, kala-oh tulguk, bawngtal kap tul khat le laa tulkhat a nei hi.

¹³Tapa sagih le tanu thum zong a nei hi.

¹⁴A tanu masa pen min Jemimah phuak a, a nihna Keziah le a thumna Keren-Happuch a phuak hi.

¹⁵Leitung khempeuh ah Job tanute zah a numei melhoih kimu lo a, a pa un a sanggam pasalte tawh a kibangin gou a luahsak hi.

¹⁶Hih teng khit ciangin Job kum za le kum sawmli nungta lai a; amah in a tate le a tate’ tate a khanglina dong a mu hi.

¹⁷Tua ciangin khankhina, a tek sih ta hi.