Read Zokam Job 5 Bible Online

Job 5 - Zokam bible

Job 5

¹"Na ut leh sam dih in, kua’n hong dawng peuhmah hiam? A siangthote kua pen kiang lamah kihei ding na hi hiam?

²Hehsuahna in mihaipa that a, enna in mimawlpa thatlum hi.

³Kei mahmah in a kikhual mihai ka mu a, ahi hangin thakhat thu-in a inn kihamsiat hi.

⁴Ama tate lungmuanhuai na pan kigamla a, a hu om loin zum ah a kineng cip hi.

⁵Ama laksa an - lingkung laka omte nangawn a gilkial mite in netum uh a, a dangtakte in a neihsate duh in tungnak uh hi.

⁶Ahang in, haksatna lei pana po hi lo a, gimna leitung pana mengkhia tawm hi lo hi.

⁷Meisiite atung lamah a lentoh bang tektekin mihing zong a gim ding mah a suak ahi hi.

⁸"Ahi zongin kei hi leng, Pasian tungah ka ngen kik dinga a mai-ah ka thu ka nga ding hi.

⁹Amah in teh theih loh a lamdangte, sim zawh loh a nalamdangte a bawl hi.

¹⁰Leitungah guah a zusak hi; gam sungah tui a luangsak hi.

¹¹Amah in a kiniamsak mite sangkoih a; a thumte lungmuanna ah lamto hi.

¹²Amah in a zuaupilte geelna - khuta a sepna uh, a taksuak loh nadingin a dal hi.

¹³Amah in mipilte, amau zuaupilna panin mana, zuauphuak siamte ngimnate nulmang hi.

¹⁴Suntangpi in amau tungah khuamial a, sunlai pimahin zan bangin miallak zawt uh hi.

¹⁵A kamsungua namsau pan a tasamte honkhia a; a vanglian mite ukcipna pan amaute a hu hi.

¹⁶Tua hi-a a zawngte in lametna nei uh a; thutanlohna in a kam a cip hi.

¹⁷"Pasian in a sittel mite, thupha ngah ahi hi; tua ahi ciangin Thahatpa a[9] hong seknate thusim lo kei in.

¹⁸Ahang in, amah in a liamsak hangin a mahmah in a tuamsak hi; amah in liamsak a, a khutin a damsak hi.

¹⁹Tuahsiatna lianpi guk panin nang hong hu dinga; a sagihna ah lauhuaina na tuak kei ding hi.

²⁰Amah in kialpi tun ciangin sihna pan ahi zongin gal kisim ciangin namsau pan ahi zongin, nang hong tankhia ding hi.

²¹Gensiatna pan nang hong kidal dinga siatna a tun ciangin na lau kei ding hi.

²²Siatna le kialpite, na nuihsan lel dinga, leitung gamsa gilote na kihta kei ding hi.

²³Ahang in, lo sunga suangte tawh thukhun na bawl dinga, gamsa gilote tawh na kilem ding uh hi.

²⁴Na buk, a muanhuai lam na thei dinga, a vante na sittel ciangin a kisam bangmah a om kei ding hi.

²⁵Na tate a tam ding lam le na suan na khakte leitung lopa a bat ding lam na thei ding hi.

²⁶A hun a tun cianga buhphalte a kikhop bangin kumcingin na teksih ding hi.

²⁷"Hih thu ka kankhiatsa uh hi a, thumaan ahi hi. Tua ahi ciangin za inla nang tungah kibulh pah in," a ci hi.