Read Zokam Job 6 Bible Online

Job 6 - Zokam bible

Job 6

¹Tua ciangin Job in dawnga:

²"Ka lunggimna kikhai thei henla ka haksatna khempeuh kiteh theih beek lepawh!

³Tuipi gei-a sehnel teng lekzaw ngel inteh - tua hangin kamkhauh a pau kha ka hi ta ve!

⁴Vanglianpa thaltangte ka sungah om a, a gu ka sungah kidiah hi. Pasian lauhuainate in kei hong do uh hi.

⁵Gamsung laate lopa nona ah ham uh hiam, ahikeh an tamna munah bawngtal ham ahi hiam?

⁶An limlote cisawh lohin kine hiam, ahikeh aktui dakang in limna nei ahi hiam? b[10]

⁷Tuate ka lawng nuam kei hi, tua bang ante in ka ci nasak hi.

⁸"Ka ngetna ngah thei ding hi leng a Pasian in ka lamet bang hong sang ding hi in,

⁹Pasian in kei hong sucip nuam ding hi henla a khut zanin kei hong that mai leh!

¹⁰Tua ciangin Siangtho Pa’ thute ka nial lohna - ka thuak sahpi hangin ka nuam ding hi - cih ka kihehnem lai veve ding hi.

¹¹"Lametna ka neih lai nadingin ka tha hat nawn ahi hiam? Ka lungduai zawh nadingin bang lamen lai ding ka hi hiam?

¹²Kei in suang thahatna nei ka hi hiam? Ka satakte sumngo ahi hiam?

¹³Tu-in zawhna in hong taisat nungsang kei le kei kihuh zo lai ka hi hiam?

¹⁴"Lametna bei mipa in Thahatpa a kihta kei zongin a lawmte it ding kisam hi.

¹⁵Ahi hangin ka sanggamte a kimuang thei lo lui pana letkhia tuisam luanglet bang uh a,

¹⁶nin a khalhnelh vuk, vuk a tui cianga a khang,

¹⁷ahi hangin khua keu hun cianga a luang nawn lo, ni a sat cianga a luanna ah a kangcip luitui bang lel na hi uh hi.

¹⁸Khualzin mite a lampi panin pial uh a; gam simthamah tungin kisia uh hi.

¹⁹Tema khualzinte in tui zong uh a, Sheba sumbuk khualzinte in lamenin en uh hi.

²⁰Amaute in a muan mahmah uh hangin lungdong uh hi. Tua phual tung uh a, cimawh uh hi.

²¹Tu-in note in zong tua mah bangin nong huh theih nading uh om lo hi; a kihtakhuai pawlkhat mu le uh cin na lau uh hi.

²²‘Kei tangin na khatpeuh na piaksak un, note neihsa panin bang khatin kei hong tan un,

²³ka galte khut pan hong hukhia un, kei hong nengcipte gamtatna panin hong tankhia un,’ hong ci ngei ka hi hiam?

²⁴"Hong hilh le uh cin ka daipah ding hi; ka khialhnasa mun hong lak dih un.

²⁵Amaan kammalte thuakhak mahmah hi! Ahi zongin no hong taihilhna in bang phatuamsak ahi hiam?

²⁶Ka gente sittel hong sawma huih let banga cimawh mi kammalte thupi sim na hi uh hiam?

²⁷Pa nei lote adingin ai nangawn sanin na lawmte uh zuakmang na sawm uh hi.

²⁸"Ahi zongin tu-in kei hong en unla hong hehpih un. Note mai-ah zuauphuak ding ka hi hiam?

²⁹Ngaihsun pha un, thutang lo kha kei un; ngaihsun kik lai dih un, ka cihtakna lauhuai din mun tung ta hi. a[11]

³⁰Ka muk panin kamsia khatpeuh ka pau kha hiam? Ka kam in a sia a pha khentel thei lo hi, na ci uh hiam?