Read Zokam Job 7 Bible Online

Job 7 - Zokam bible

Job 7

¹Mihing in leitungah nasep haksa sep ding nei hi lo ahi hiam? Ama nite a kicial nasempa aa tawh kibang hilo ahi hiam?

²Silate in nitak niliap hun a ngaklah bang ahikeh a thacialte in thaman a ngaklah bangin

³kei zong a mawkna-in kha tampi ka ngak a, lunggimna zan kei tungah hong tung hi.

⁴Ka lup ciangin, ‘ka thawh ma bangtan a sawt tam?’ ci-in ka ngaihsun hi. Zan sawt mahmah a khuavak mateng ka kigawigawi hi.

⁵Ka pumpi in than le meimakhem bek puansilhin nei-a, ka vun kitamin a naiphual hi.

⁶"Ka nite, siamgante siamphei sangin kinawh zaw a, lametna om loin a mong tung pahpah hi.

⁷Pasian aw, ka nuntakna husan khat bek ahilam hong phawk in; ka mit in lungnopna mu kik nawn lo ding hi.

⁸Tu-a kei hong mute in hong mu nawn kei ding uh hi; kei nong zong dinga ka na om nawn kei ding hi.

⁹Meiilum kaite thengin a manthan bangin, han b[12] sung tungsate, a kileh kik kei hi.

¹⁰Amah a inn ah ciah kik ngei lo dinga, a omna mun in a thei nawn kei ding hi.

¹¹"Tua ahi ciangin ka sip dide thei kei hi; ka lunggim manin ka paukhia dinga, ka lungkham manin ka phun ding hi.

¹²Kei nong cin dingin tuipi, ahikeh tuipi ganhing lianpi ka hi hiam?

¹³Lum leng ka nuamtuam dinga, ka lupna ah ka lungkhamna bei inteh ci-a ka ngaihsut ciang nangawnin

¹⁴ka mangin nong linthawn a, mangmuhna-in nong lausak hi;

¹⁵tua hi-a hibang pumpi a ka om sangin kitawlsanin si leng ka utzaw hi.

¹⁶A nungta tawntung ding lah hi lo ing a, ka nuntakna ka cimtak hi. Ka nuntakna in khiatna nei kei; hong hicisak hoh in.

¹⁷"Hizah taka na bawl ding, hizahta a na lunghimawh ding,

¹⁸zingsang simin na sittel ding le a hun sima na zia-et dingin mihing bang hi lel ahi hiam?

¹⁹Tomcik sung beek hong pelh loin, tomcik sung khat beek kei guak hong omsak lo ding na hi hiam?

²⁰Mihing encikpa aw, a mawh khinsa ka hileh, nang tung bang hong bawl ka hi hiam? Bang hangin kei muitum a hong nei na hi hiam? Na vangik suak ka hi hiam? a[13]

²¹Bang hangin ka thupalsatnate hong maisakin, ka mawhnate hong maisak lo na hi hiam? Ahang in, leivui lakah ka lum baih ta ding hi; kei nong zong dinga, ahi hangin ka om nawn kei ding hi," a ci hi.