Read Zokam Job 9 Bible Online

Job 9 - Zokam bible

Job 9

¹Tua ciangin Job in dawng a:

²"Hihi, hih in thumaan ahilam ka thei hi. Ahi hangin Pasian mai-ah mihing bangci thumaan thei ding hiam?

³Mi khat amah tawh kisel nuam taleh kam tul khat lakah kam khat zong a dawng thei kei hi.

⁴Ama pilna thukin a vangliatna zai hi. Kua in amah nialin gimthuak loin suakta ngei hiam?

⁵Amah in mualte a theihloh kalun khin a, a heh suakin a lumlet hi.

⁶Amah in leitung a omna panin lok a, a khuampite a lingsak hi.

⁷Ni hopih a, a tang kei hi; amah in aksi tangte a khakcip hi.

⁸Amah kia in vantungte zalh a, tuipi hualte tung a tawn hi.

⁹Amah,Khawlei-uikai, Zawlzawng, Seguk le leitaw-lam aksite a bawlpa ahi hi.

¹⁰Amah in kuama tehzawh loh a lamdang, simzawh loh a nalamdangte a bawl hi.

¹¹Kei kiangah hong baanga, amah ka mu thei kei hi. Kei kiang hong nawk ciangin amah ka thei thei kei hi.

¹²Amah in bawtkhiamang leh kua in kham thei hiam? Kua in a kiangah, "Bang hih na hiam?" ci thei ahi hiam?

¹³Pasian in hehna dok kik lo hi; Rahab galkapte nangawn a khe phungah kun uh hi.

¹⁴"Tua ahileh ken amah bangci nial theih ding ka hi hiam? Amah ka nial zawh nading kammal bangci muh thei ding ka hi hiam?

¹⁵Mawhpeng ka hi kha zongin, amah ka dawng kik thei kei ding hi; ka Thukhenpa tungah hong lainat nading ka thum thei bek hi.

¹⁶Ken amah samin hong dawng ta leh zong, ka thu hong zaksak nuamin ka um kei hi.

¹⁷Amah in huihpi hong zialnelhsakin a thu om lopi-in ka liamna a khangsak ding hi.

¹⁸Kei hong husangsak man loin lungkhamna bek hong zensak ding hi.

¹⁹Thatang hat thu hileh amah hat mahmah hi! Thutan zawhthu hileh kua in amah a[16] sam zo ding hiam?

²⁰Kei mawhpeng hi ta leng zong ka kam in kei hong mawhpaih hi; kei a paubaang lo hi ta leng zong, tua in kei mawh nei hong ci ding hi.

²¹"A paubaang lo ka hi ta zongin, kei le kei ka kithupisak kei a, ka nuntakna ka thusim kei hi,

²²A vekpi in kibang hi; tua ahi manin, ‘A paubaang lote le a gilote susia khawm hi,’ ka ci hi.

²³Satna in manlanga a sihsak ciangin mawhpengte lungmanna zahpih lel hi.

²⁴Gam khat migilote khut sung a tun ciangin, amah in thukhente mit a tunsak hi. Tua pen amah ahi kei leh kua hi ding hiam?

²⁵Laitaipa sangin ka nite kinawhzaw a, lungnopna loin a lengmang pah hi.

²⁶Amaute phaikung gunkuang bangin tolh uh a, muvanlai sa bawhsuk a bang uh hi.

²⁷‘Ka phunnate mangngilhin, ka maipuak khelin nuihmai ning,’ ci ta leng,

²⁸kei a mawhpengin hong seh tuan lo ding uh cih thei ka hi manin, ka thuaknate khempeuh ka kihta lai hi.

²⁹A mawh a hong kimusa ka hi nungsang, bang hanga a mawkna-in kibuaisak lai ding ka hi hiam?

³⁰Saban b[17] in kei le kei kisil leng a, ka khutte tangalin sil ta leng,

³¹buandiim khuk sungah nong sawnkhia dinga, ka puan nangawn in kei hong kih ding hi.

³²"Amah ka dawn theih dingin kei bangin amah mihing hi lo a, thukhen zumah khat le khat kimaituah theih ding ahi kei hi.

³³Kote kikalah thukhensat ding khat beek om henla, a langnih tuakin a khut nga in,

³⁴kei tung pan Pasian cianggolh hong paihsak ding khatpeuh om henla, ama linthawnna in kei hong lausak nawn lo ding hileh

³⁵tua ciangin amah kihta loin ka genkhia ding hi; ahi zongin tu-in ka hi ding bang ka hi thei kei hi.