Read Zokam Phatna-late 101 Bible Online

Phatna-late 101 - Zokam bible

Phatna-late 101

¹David phuah. Phatna-la khat. Na itna le na thutang la-in ka sa ding hi; TOPA aw, phatna la nang kong sak ding hi.

²Paubaang lo-a ka nuntak nadingin ka kidawm ding hi - cik ciangin kei kiangah hong pai ding na hi hiam? Lungsim paubaang loin ka inn sungah ka kalsuan ding hi.

³A sia na khatpeuh ka mitsuan lo ding hi. Upna neilote nasepte ka mudah hi; amaute in kei hong beel kei ding uh hi.

⁴A lungsim kawi mi kei tawh kigamla dinga; gitlohna tawh ka kisawhkha kei ding hi.

⁵A vengte a gensia sim peuhmah ka daisak dinga; kiphatsak mithah a, lungsim kisatheite ka thuak kei ding hi.

⁶Gam sunga mi muanhuaite tungah ka mit tu dinga, kei tawh tengkhawm thei ding uh hi; paubaang lo a kalsuan mi in ka na a sem ding uh hi.

⁷Khemna a zang mi khat beek ka inn ah teng lo dinga; zuauphuakte khat beek ka mai-ah a ding kei ding hi.

⁸Gam sunga migilote khempeuh zingsang simin ka daisak dinga; gilo-a gamta khempeuh TOPA’ khuapi panin ka khenkhia ding hi.