Read Zokam Phatna-late 102 Bible Online

Phatna-late 102 - Zokam bible

Phatna-late 102

¹Gim ngah mi khat thungetna. Thazawm ciangin TOPA mai-ah a tamlawhna, a sunna. TOPA aw ka thungetna hong za in; kong huh ngetna nang kiang hong tung hen.

²Ka lungdon hunin na maitang hong selsan kei in. Na bil kei lam hong ngat inla; kong sap ciangin manlangin hong dawng in.

³Ahang in, ka nuntak nite meikhu bangin manga; ka guhte mei-am kuanglai bangin a sa hi.

⁴Ka lungtang maibuakin lopa bangin ka vul a; ka an nek ding ka mangngilh hi.

⁵Ka nak tau luat manin ka kiam a, guh le vun bek ka hi hi.

⁶Sehnel simbu ka banga, kisiatnate laka simbu om ka bang hi.

⁷Ka lupsa-in ka hak gega a, innkhum dawna vasa tangtuan ka bang hi.

⁸Ka galte in sun niloh in hong phin uh a, kei hong langneihte in ka min hamsiatna-in a zang uh hi.

⁹Ahang in, vut an in ka nei a, ka dawn zong khitui tawh a kihel hi;

¹⁰na thangpaihna a liatluat manin hong domkangin na pam nong denna hi.

¹¹Ka nuntak sung nite lah nitaklam niliap bang a; lopa bangin ka vul ta hi.

¹²Ahi hangin TOPA aw, nang kumpi tokhom ah na tu tawntung a; khang tawntungin hong kitheihna kip den hi.

¹³Zion angvan hunta ahi manin hong thoin amah na khuatuah ding hi; hun ciangtan zah cingta hi.

¹⁴Ahang in, na nasemte in suangtumte nangawn it uh a, ama leivuite nangawn a hehpih uh hi.

¹⁵Minamte in TOPA min kihta ding uh a, leitung kumpite khempeuh in na minthanna a zahtak ding uh hi.

¹⁶Ahang in, TOPA in Zion lam kikin a minthanna tawh a kilang ding hi.

¹⁷Amah in a hawmsuakte thungetna dawng dinga; amaute thumna a simmawh kei ding hi.

¹⁸A kipiangsak nai lote in TOPA a phat theih nadingun mailama khanglai dingte adingin:

¹⁹" TOPA in a sangna-a a mun siangtho panin ensuk a; van panin leitung ensuk in,

²⁰amah in thongkiate tauna za dinga, si dinga kimawhpaihte a khahkhia ding hi," ci-in kigelh hen.

²¹Mite le kumpi-gamte TOPA bia dingin a kikhop hun ciangin

²²Zion ah TOPA min kipulakin, Jerusalem ah amah phatna a kigenkhia ding hi.

²³Ka khangtung laitakin ka tha kiasak a; ka nuntak hun a[172] a khiam hi.

²⁴Tua ciangin: "Ka Pasian aw, ka nuntak kimtanin kei hong lamang kei in; nang kumte khang tawntungin a kizomsuak ding hi.

²⁵A tungin leitung bulpi na phut a vante na khuta na bawlsa ahi hi.

²⁶Amaute mangthang ding uh a, nang na om den ding hi; amaute khempeuh puan bangin patkhia ding hi. Puan silh lai bangin tuate na kheng dinga, amaute a kinilkhia ding hi.

²⁷Ahi hangin nang na kibang dena na nuntak kum bei ngei lo ding hi.

²⁸Na nasemte’ tate na omna ah teng ding uh a, amau suante na mai ah a kikipsak ding hi," ka ci hi.