Read Zokam Phatna-late 103 Bible Online

Phatna-late 103 - Zokam bible

Phatna-late 103

¹David phuah Ka hinna aw, TOPA phat in, ka sungtawng a om khempeuh aw, a min siangtho phat un.

²Ka hinna aw, TOPA phat inla ama hanga phattuamna khempeuh mangngilh kei in.

³Amah in na mawhnate khempeuh maisakin na natnate khempeuh damsaka,

⁴amah in gum panin na nuntakna tankhia-in itna le khuatuahna hong khusak hi.

⁵Na khangnona muvanlai aa a bat kik nadingin na lunggulhna a hoihte in a taiisak hi.

⁶A kinengniam khempeuh tungah TOPA in thumaan thutangin na a sem hi.

⁷Amah in Moses tungah a lampite theisak a, Israel mite tungah a nasepte theisakin:

⁸TOPA in mi khuatuah siamin hehpih siama, heh baih loin a dimlet itna a nei hi.

⁹Amah in eite hong mawhsak den lo dinga, a hehna hong nga tawntung kei ding hi;

¹⁰amah in i mawhna tawh kituakin hong tuaksak lo dinga, i gamtat khialhnate tawh kituakin hong thuk kik kei ding hi.

¹¹Ahang in, leitung panin vante a san bangin amah a kihtate a itna lian lua a;

¹²nisuahna panin nitumna a gamlat bangin eite panin i tatkhialhnate a hemkhia hi.

¹³Pa khat in a tate a khuatuah bangin TOPA in amah a kihtate a khuatuah hi;

¹⁴ahang in, amah in eite hong kibawlzia thei a, eite leivui i hilam a phawk hi.

¹⁵Mihing ahileh amah nuntak sung lopa bang lel hi-a, gamlak pak banga palh ahi hi;

¹⁶huih in mutin mangpah a, a omna mun kiphawkkha nawn lo hi.

¹⁷Ahi hangin TOPA itna ahileh amah a kihtate tungah tawntung panin a tawntung dongin kipden a, ama thumaanna amau tate’ tate tawh a om hi -

¹⁸tua in ama thukhun a zuite tung le a thusehte man ding a phawk gigete tungah a om hi.

¹⁹TOPA in vantung ah a tokhom kipsak a, a kumpi-gam in na khempeuh a uk hi.

²⁰No ama vansawltakte, ama thu bang a sem a thahat ama thu a mangte aw TOPA phat un.

²¹No ama vantung mihonpite, ama deih bang a sem nasemte khempeuh aw, TOPA phat un.

²²Ama kumpi-gam sung mun khempeuh-a ama nasepte khempeuh aw, TOPA phat un. Ka hinna aw, TOPA phat in.