Read Zokam Phatna-late 105 Bible Online

Phatna-late 105 - Zokam bible

Phatna-late 105

¹TOPA tungah lungdam ko-in a min lo unla; ama sepsate, minamte lakah kitheisak un.

²Amah la sak un, amah phatna la sak un; ama nasep lamdang teng genkhia un.

³A min siangtho thangta hen; TOPA a zongte lungsim nuam ta hen.

⁴TOPA le ama hatna enin; ama maitang zong den un.

⁵Ama sepsa a lamdangte, ama nalamdang bawlte le a genkhiat a thukhennate,

⁶no a nasempa Abraham suante aw, no ama teelsa Jacob’ tapate aw, phawk gige un.

⁷Amah eite Pasian, TOPA hi-a; a thukhennate leitung khempeuh ah a om hi.

⁸Amah in a thukhunsa phawk tawntung a, a thupiaksa kammal khang tulkhat dong a phawk hi,

⁹tua in Abraham tawh a bawl thukhun Isaac tungah tomlo-a a thuciam ahi hi.

¹⁰Amah in Jacob tungah thukho-in kipsakin, Israel tungah tawntung thukhunin kipsak a:

¹¹"Nang tungah tanga na luah dingin Canaan gam kong pia ding hi," ci hi.

¹²Amaute tawmkha bek pha uh a, tawm takpi-in tua lai-ah mikhual suak uh a,

¹³gamkhat pan gam khat, kumpi-gam khat pan adang khatah a pai kawikawi uh hi.

¹⁴Amah in amaute kuama nuainet ding phal loin; amaute a khual kumpite tai a:

¹⁵"Ka sathau nilhte lawngkha kei unla; ka kamsangte nasak kei un," ci hi.

¹⁶Amah in leitang tungah kialpi samsuk a, amaute an ngahna khempeuh suksiatsakin;

¹⁷amaute mai-ah mi khat sawla - sila bangin Joseph a kizuak hi.

¹⁸Amaute in kol bulhin a khete kolhsak uh a, a ngawng ah sikkualte tawh khihin,

¹⁹ama magensate a tunkim mateng, TOPA’ kammalin amaan a hina a lah matengin a tua cih uh hi.

²⁰Kumpipa in amah khah dingin mi sawl a, mite ukpa in amah suaktasak hi.

²¹Amah in a innkuan sung ukpa-in koih a, a neihsa khempeuh uksakin

²²ama lungkimna bangin a kumpitapate lamlaksak a, a upate pilna a hilhsak hi.

²³Tua ciangin Egypt ah Israel lut a; Ham gam ah Jacob, pemta-in a teng hi.

²⁴TOPA in ama mite pungsak mahmah hi; a galte adingin a tam lua zahin bawla,

²⁵ama mite mudah dingin amaute lungsim heisaka, ama nasemte a sawmsimsak hi.

²⁶Amah in ama teelsa Aaron le a nasempa Moses a sawl hi.

²⁷Amaute gel in amaute lakah ama lim lamdangte bawl uh a, a nalamdangte Ham gamah a bawl uh hi.

²⁸Amah in khuamial sawlin tua gam a mialsakna - amaute in ama thute a lehdo man uh hi lo hiam?

²⁹Amah in a tuite uh sisan suaksak a, a ngasate uh a sisak hi.

³⁰A gam uh uiphuk dimsak a, amau gam-ukte lupna inndei sungah a kahto hi.

³¹Amah kam pau a, thopi le cippi honpi a gam sungteng uh a tung hi.

³²Amah in guahtui gialtang suaksakin amau gam sung tengah khua phiasak hi;

³³a lengguite uh le a theikungte uh denggawpsakin amau gam sunga singkungte a dengpalhsak hi.

³⁴Amah kam pau a, kaukhup le kauphe sim zawhloh a tung hi;

³⁵tuate in gam sunga singkung le lohing teng gaitum a, a lei hoih panun a piang teng gaikhin hi.

³⁶Tua ciangin amaute gam sunga ta masa khempeuh, pisal pana gahmasa khempeuh a vatlum hi.

³⁷Amah in ngun le kham tawh Israel paikhiatpih a, amau behte lakah a gina lo khat beek a om kei hi.

³⁸Israel kihtakhuaina amau tungah tung ahi manin amaute a paikhiat uh ciangin Egypt-te a nuam uh hi.

³⁹Amaute tuam dingin meiipi kaisak a, zana a khuavak dingun mei a pia hi.

⁴⁰Amaute in ngen uh a, vamin pia-in amaute vantung anlumin a taisak hi.

⁴¹Aman suangpi khangkhamsak a, tui kikhawhkhia-in, sehnel-gam ah gun bangin a luang hi.

⁴²Ahang in, amah in a nasempa Abraham tunga a kamciamna siangtho a phawk gige hi.

⁴³Amah in a mite lungnuamtakin paikhiatpih a, ama teelsate nuama kikona tawh paikhia uh a;

⁴⁴amaute tungah minamte’ gamte pia-in midangte thalawhsa gamh luah uh a -

⁴⁵tua pen amaute in a thusehte le a thukhamte a zuih theih nading uh ahi hi. TOPA phat un. a[176]