Read Zokam Phatna-late 106 Bible Online

Phatna-late 106 - Zokam bible

Phatna-late 106

¹TOPA phat un. b[177] TOPA hoih ahi manin ama itna kip tawntung hi, ama tungah lungdam ko un.

²Kua in TOPA nasep thupite thangsakin amah phatna a cingin pulak thei ding ahi hiam?

³Thutangin na sema a thumaan tawntungte thupha ngah ahi hi.

⁴TOPA aw, na mite tungah na angvanna na lah ciangin kei hong phawk-in, amaute na hotkhiat ciangin kei hong huh in;

⁵tua in na teelsate daupaina nuam ka sak theih nading, nangma minam nopsakna ka tanhpih theih nading na gouluah ka phatpih theih nading ahi hi.

⁶Ka pate uh mawhnate nangawnin ka mawh uh a; kote khialin ka gitloh gamtat khin uh hi.

⁷Ka pate uh Egypt ah a om lai-un, nangma nalamdang bawlte ngaihsun lo uh a; na migitna tampite phawkkha loin tuipi gei, tua San Tuipi c[178] gei-ah a lehdo uh hi.

⁸Hi napi, a thahat ama vangliatna a kitheih nadingin ama min a khualna-in amaute honkhia hi.

⁹Amah in San Tuipi tai-a keucipin; sehnel-gam a pai bangin a thuknate ah a galkahpih hi.

¹⁰Amah in galte khut panin amaute honkhia a; galte khut panin amaute tankhia hi.

¹¹Amaute a dote tui in tuumcip a, khat beek a suakta kei hi.

¹²Tua ciangin ama thuciamte umin amah phatna a sa uh hi.

¹³Ahi hangin amaute in ama sepsa mangngilhpah uh a ama lamlahna a ngak kei uh hi.

¹⁴Sehnel-gam ah uisanin a neksate uh hongh uh a, gamkeu ah Pasian a zia-et uh hi.

¹⁵Tua ciangin amaute ngetna pia-a, ahi hangin amaute tungah gawngtaam natna a tungsak hi.

¹⁶Amaute in giahphual ah Moses le TOPA tunga ki-apsa Aaron a haza uh hi.

¹⁷Lei kamka in Dathan valh a; Abiram pawlte a vukcip hi.

¹⁸A nungzuite uh lakah mei kuanga; meikuang in a gilote a hullum hi.

¹⁹Amaute in Horeb ah bawngno lim khat bawl uh a a kisung sik milim bia uh hi.

²⁰Amaute in a Minthanna uh, lopa ne bawngtal lim khatin a khek uh hi.

²¹Amaute in amau a honkhia Pasian, Egypt a na lianpi a bawlpa,

²²Ham gam ah nalamdangte bawlin San Tuipi gei-ah a mulkimhuaite a bawlpa mangngilh uh hi.

²³Tua hi-a amaute susia dinga a thangpaihna panin a heikhia ding ama teelpa Moses a mai-ah ding lo hileh - a mah in amaute ka susia ding hi, a cihsa ahi hi.

²⁴Tua ciangin amaute in tua gam nuam simmawh uh a; ama thuciam a um kei uh hi.

²⁵Amau puanbuk sungah phun uh a, TOPA thu a mang kei uh hi.

²⁶Tua ciangin a khut lamtoin sehnel-gamah amaute puksak ding,

²⁷amau suante minamte lakah a puksak ding le gam sung tengah thehthang dingin amaute tungah kiciam hi.

²⁸Amaute Poer a Baal tawh a kizomsa hi-in nuntakna a nei lo pasiante biakna-a kipiate ne uh a;

²⁹amaute gamtatna hoih loin TOPA hehsak uh a, tuateh amaute lakah pulpi a tung hi.

³⁰Ahi hangin Phinehas dingto-a va lailutin, tuateh pulpi a veng hi.

³¹Hih in hong tung ding a mong nei lo khanghunte ah ama adingin thumaanin kisimsak hi.

³²Meribah tuite gei ah amaute in TOPA hehsak uh a, amaute hangin Moses tungah lungkhamna a tung hi;

³³ahang in, amaute in Pasian Kha langdo uh a, Moses muk a[179] panin kamkhauh pusuak hi.

³⁴TOPA thupiaksa bangin amaute in mite susia lo uh a

³⁵ahi hangin minamte tawh kihelzau-in amau ngeinate a zuihsak uh hi.

³⁶Amau milimte bia uh a amaute kisiahna thang a suak uh hi.

³⁷Amaute in a tanute a tapate uh dawite biakna-in a pia uh hi.

³⁸Amaute in mawhpengsisan luangsakin a tanu a tapate uh sisan Canaan milimte tungah biakna-in pia uh a, amaute sisan in tua gam buahsak hi.

³⁹Amau sepsa-in amau mah kininsak uh a, amau sepsate mahin a kizuak a suak uh hi.

⁴⁰Tua ahi ciangin a mite tungah TOPA heh a, ama goutanh a kih hi.

⁴¹Amah in minamte tungah amaute pia a, a galte un amaute uk uh hi.

⁴²A galte un amaute nengniam uh a amaute khut nuai ah na semsak uh hi.

⁴³Amah in amaute tamveipi hukhia hi, ahi zongin amaute in lehdo teitei uh a, amau mawhna hangin kiamkiam uh hi.

⁴⁴Ahi hangin amah in amaute kikona a zak ciangin, a lungdonna uh thei a;

⁴⁵amaute a khualna-in a thukhun phawka a itna a liatluatna hangin a kihei kik hi.

⁴⁶Amaute sal-a a kaite khempeuh in a hehpih nadingin amaute tungah a piangsak hi.

⁴⁷Kote Pasian TOPA aw, hong hon inla, na min siangtho tungah lungdam ka koh theih nading uh le na minthanna ka phat theih nadingun minamte panin kote hong kaikhawm in.

⁴⁸A tawntung pan tawntung dongin Israel Pasian, TOPA kiphat hen. Mi khempeuh in, "Amen!" ci uh hen, TOPA phat un.