Read Zokam Phatna-late 109 Bible Online

Phatna-late 109 - Zokam bible

Phatna-late 109

¹Tumtheih makaipa ading. David phuah. Phatna-la khat. Kong phat Pasian aw, dai dide-in om kei in,

²ahang in, migilote le zuauphuakte kei langkhat ah kamka uh a; zuaugenna leii-in ka langah thu gen uh hi.

³Muhdahna kamte tawh kei hong umcih uh hi; amaute in a thu om loin kei hong busim uh hi.

⁴Ka lawmbawlna thukna-in kei hong mawhsak uh a, ahi hangin kei thungen mi ka hi hi.

⁵Amaute in hoihna, gitlohna-in hong thuk uh a, ka lawmbawlna, muhdahna-in hong thuk uh hi.

⁶Amah do dingin migilo a[181] khat seh b[182] inla, a taklam ah a mawhsakpa c[183] ding hen.

⁷Amah thu a kisit ciangin mawhkhu henla, a thungetna in mawhpaih hen.

⁸A nuntak hun tom henla; ama makaihna mun midangin luah ta hen.

⁹A tate pa nei lo suak henla, a zi meigong hen.

¹⁰A tate khutdawh-a ngenin vak kawikawi uh henla, amau inn siasa panin kihawlkhia d[184] hen.

¹¹A leibatnapa in a neihsa teng matsak henla; khualmite in a sepsa gahte lawk uh hen.

¹²Ama tungah a migi khat zong om loin, pa nei lo a tate kihehpih kei hen.

¹³Ama suante kibeisak henla, khang banzopna panin kiphiatkhia hen.

¹⁴A pate tatkhialhnate TOPA mai-ah kiciamteh henla; a nu mawhna kiphiatkhia ngei kei ta hen.

¹⁵Amaute ciamtehna leitung pan a beisak theih nadingin TOPA mai-ah amau mawhnate om den hen.

¹⁶Ahang in, amah in migit ding ngaihsun ngei lo a, mizawngte, a tasamte le lungsim tamkhamte sisak dingin a beng hi.

¹⁷Hamsia zat nuam a sa hi - ama hamsiate e[185] ama tung tu hen; thupha piak nuam a sa kei hi - amah tawh f[186] kigamla hen.

¹⁸Amah in hamsia puan bangin silh a; a pumpi sungah tui bangin lut a, a guh sungah sathau bangin a lut hi.

¹⁹Tuate in puantualpi bangin amah tuam henla, kawnggak-a gak bangin amah gak den hen.

²⁰Kei hong mawhsakte le kei tunga gitloh kampaute tungah TOPA in hih bangin thuk ta hen.

²¹Ahi hangin Thuneipipa TOPA aw, na min na khualna-in kei tungah hong thunuam inla; na itna a hoihna hangin kei hong hu in.

²²Ahang in, kei zawngin ka tasam a, ka sungah ka lungsim a liam hi.

²³Nitak niliap bangin kei ka mang hiaihiai a, kaukhup bangin kei hong kisingkhia hi.

²⁴Antanna hangin ka khuk zaw a; ka pumpi kiamin ka gawngtaam hi.

²⁵Kei hong mawhsakte simmawhin ka om a; kei hong muh uh ciangin a lu uh hong peisan uh hi.

²⁶Keima Pasian TOPA aw, hong huh in; na itna tawh kituakin kei hong hon in.

²⁷TOPA aw, tua in nangma sepsa, na khuta na sepsa ahilam amaute theisak in.

²⁸Amaute in hamsiat ta leh nang thupha na pia ding hi; amaute in a sim uh ciangin kimaizumsak dinga, na nasempa a lungnuam ding hi.

²⁹Kei hong mawhsakte maimawlna kisilhsakin puantualpi silh bangin maizumna in a tuam ding hi.

³⁰Ka kam tawh lianpi-in TOPA ka tawisang dinga; mi tampi lakah amah ka phat ding hi.

³¹Ahang in a mawhpaihte pan a nuntakna hutsak ding a tasamte taklam ah ding hi.