Read Zokam Phatna-late 118 Bible Online

Phatna-late 118 - Zokam bible

Phatna-late 118

¹TOPA hoih ahi manin ama tungah lungdam ko un; ama itna kip tawntung hi.

²Israel in: "Ama itna kip tawntung hi," ci uh hen.

³Aaron innkuante in: "Ama itna kip tawntung hi," ci uh hen.

⁴TOPA a kihtate in: "Ama itna kip tawntung hi," ci uh hen.

⁵Ka lunggim hunin TOPA ka sam a, ama’n hong dawngin kei hong khahkhia hi.

⁶TOPA in kei hong ompih hi; ka lau kei ding hi. Mi in kei bang hong cih thei ding ahi hiam?

⁷TOPA in kei hong ompih hi; amah kei hong huhpa ahi hi. Ka galte tungah gualzo-in ka en ding hi.

⁸Mihing i muan sangin TOPA belh hoihzaw hi.

⁹Gam-ukte i muan sangin TOPA belh hoihzaw hi.

¹⁰Minamte khempeuh in kei hong umcih uh hangin TOPA minin amaute ka khaktan hi.

¹¹Amaute in ka kim ka pam ah hong umcih uh hangin TOPA minin amaute ka khaktan hi.

¹²Amaute in khuaipi hon bangin kei hong pumtuam uh hangin linglak kang bangin manlangin a simang uh hi; TOPA minin amaute ka khaktan hi.

¹³Kei hong kithalsawnin ka puk dek hangin TOPA in kei hong huh hi.

¹⁴TOPA ka thahatna le ka zaila hi a; keima hotkhiatna a suak zo hi.

¹⁵Gualzawhna le lungdama kikona in a thumaante puanbuk sung thawn a: "TOPA khut taklam in a thahat nate sem khin ta!

¹⁶TOPA khut taklam a sangin kilamto a; TOPA khut taklam in a thahat nate sem hi!" ci hi.

¹⁷Kei si loin ka nungta dinga, TOPA sepsa ka tangko ding hi.

¹⁸TOPA in nasiatakin hong taihilh hangin sihna hong thuaksak zen lo hi.

¹⁹Thumaanna kongpite kei hong hon in, lutin TOPA tungah lungdam kong ko ding hi.

²⁰Hih in TOPA kongpi hi-a, thumaan mite lut theih nading ahi hi.

²¹Kei hong dawng na hi manin lungdam kong ko ding hi. Keima hotkhiatna na hi ta hi.

²²Inn lamte nolh suangin innkhum nang suang suak zo hi.

²³TOPA in hih sem khin a, eite mitmuh in a piandang hi.

²⁴Tu-ni TOPA bawlsa ahi hi; eite’n nuamsa in kipak ni.

²⁵TOPA aw, kote hong honkhia in; TOPA aw, kote zawhna hong pia in.

²⁶TOPA mina hong paipa thupha ngah ahi hi. TOPA inn panin nang a[200] thupha kong pia uh hi.

²⁷TOPA in Pasian hi-a, ama khuavak eite tungah hong tangsak hi. Khut ah singhiang tawisa in, biakna-tau’ kite dongin b[201] pawi bawlin hong kizomsak hi.

²⁸Nang ka Pasian na hi hi, lungdam kong ko ding hi; nang ka Pasian na hi hi, nang kong tawisang ding hi.

²⁹TOPA hoih ahi manin ama tungah lungdam ko un; ama itna kip tawntung hi.