Read Zokam Phatna-late 119 Bible Online

Phatna-late 119 - Zokam bible

Phatna-late 119

¹TOPA thukham zui-in kalsuan a a gamtatna uh genbaanna a om lo mite thupha ngah ahi hi.

²Ama ngeinakipte zui-a, amau lungsim neihzah a amah a zongte thupha ngah ahi uh hi.

³Amaute in khialhna bangmah sem lo a, ama lampite a tawn uh hi.

⁴Nang in a veka man’ kim ding thusehte na koih khin hi.

⁵Na thukipte ka zuih manin ka lampite kip leh maw!

⁶Tua hileh na thupiakte khempeuh ka ngaihsut ciangin ka mai hong zumsak lo ding hi.

⁷Na thukham maante ka sin bangin lungsim tangtakin nang kong phat ding hi.

⁸Na thukipte ka mang ding hi; kei hong nusiacipsak kei in.

⁹Tangvalno khat in a gamtatna a siangtho-in bangci kep thei ding hiam? Na thu banga nuntakna in a siangthosak thei ding hi.

¹⁰Ka lungsim neihzahin nang kong zong hi; na thupiakte panin kei hong pialsak kei in.

¹¹Nang tungah ka mawh khak loh nadingin ka lungsim sungah na thu ka seel hi.

¹²TOPA aw, nangmah hong kiphat hen; na thukipte kei hong hilh in.

¹³Na kam pana pusuak thukham khempeuh ka mukin ka simkik hi.

¹⁴Mi khat in hauhna lianpi a lungnoppih bangin na ngeinakipte zuih ka lungnoppih hi.

¹⁵Na thusehte ka lungngaingai-a, na lampite ka ngaihsunsun hi.

¹⁶Na thukipte ah ka lungtai hi; na thu ka thusim lo kei ding hi.

¹⁷Na nasempa tungah hong hoih lecin ka nungta dinga; na thu ka mang ding hi.

¹⁸Na thukham sunga a lamdang nate ka muh theih nadingin ka mitte vaksak in.

¹⁹Leitungah mikhual ka hi hi; kei panin na thupiakte sel kei in.

²⁰Na thukhamte ka deihluat denna in ka hinna valhtum hi.

²¹Nangmah in a ki-uangsak hamsiat thuak, na thupiakte pana pialte na tai hi.

²²Keimah in na ngeinakipte zui ka hi manin kei kiang panin thusimlohna le simmawhna hemkhia in.

²³Uliante tukhawmin kei hong gensiat uh hangin na nasempa in na thukipte a lungngaingai ding hi.

²⁴Na ngeinakipte nuam ka sa hi; thu hong kuppih tuate ahi hi.

²⁵Leivui lakah hong kisial hi; na thu bangin ka nuntakna hong hawi in.

²⁶Ka lampite ka sut kika nong dawng hi; na thukipte hong hilh in.

²⁷Na thusehte a deihna hong theitelsak in; tua ciangin nangma nalamdangte ka lungngaingai ding hi.

²⁸Keima hinna dah in gim hi; na thu bangin tha hong guan in.

²⁹Lampi zuaute panin kei hong kem inla; na thukham tawnin kei hong hehpih in.

³⁰Thutak lampi ka teel khin a; na thukhamte ah keima lungsim ka nga hi.

³¹TOPA aw, na ngeina kipte ka lenkip hi; kei hong maizumsak kei in.

³²Ka lungsim suaktasak na hi manin na thupiakte lam ah ka tai hi.

³³TOPA aw, na thukipte zuih ding hong hilh in; tua hileh a tawp dong ka zui ding hi.

³⁴Theihtelna hong guan lecin na thukham ka zui dinga ka lungsim neihzahin ka mang ding hi.

³⁵Na thupiakte lam ah hong makaih in, ahang in tua lai nuam ka sa hi.

³⁶Na ngeina kipte lamah ka lungsim hei inla angsung khualna lam ngasak kei in.

³⁷Man neilo nate panin ka mitte heikhia inla; na thu a[202] bangin ka nuntakna hawi in.

³⁸Nang kong kihtak theih nadingin na nasempa tunga na thuciam tangtun in.

³⁹Na thukhamte hoih ahi manin a lauhuai maimawlna lamang in.

⁴⁰Na thusehte ngai nang e! Nangma thumaanna-in ka nuntakna hong hawi in.

⁴¹TOPA aw, nangma itna kip le na thuciam banga na hotkhiatna kei tungah hong tung ta hen;

⁴²tua hileh na thu muang ka hi manin kei hong selnohpa ka dawng thei ding hi.

⁴³Na thukhamte lamen ka hi manin na thutak kammal ka kam panin lakhia kei in.

⁴⁴A tawntungin nangma thukham ka mang den ding hi.

⁴⁵Na thusehte theikhia khin ka hi manin suakta takin ah ka vak kawikawi ding hi.

⁴⁶Kumpite mai-ah na ngeinakipte ka gen dinga, hong kimaizumsak kei ding hi,

⁴⁷ahang in, tuate it ka hi manin na thupiakte nuam ka sa hi.

⁴⁸Ka it na thupiakte lamah b[203] ka khut ka lamto a, na thukipte ka lungngaingai hi.

⁴⁹Kei hong lamensak khin na hi manin na nasempa tunga na kammal phawk in.

⁵⁰Ka thuak laitak-a ka kihehnepna hih ahi hi: Na thuciam in ka nuntakna a hawi hi.

⁵¹A ki-uangsakte in a utut un kei hong zahpih uh a, ahi hangin na thukham ka kihei san kei hi.

⁵²TOPA aw, nangma tanglai thukhamte ka phawk gige a, tuate ka lungnoppih hi.

⁵³Na thukham a taisan migilote hangin lungkimlohna in kei hong mancip hi.

⁵⁴Ka giahna peuhpeuh ah na thukipte ka zailapi ahi hi.

⁵⁵TOPA aw, zanin na min ka phawk gige hi, na thukham ka zui ding hi.

⁵⁶Ka zuihzuihsa mah ahi: Nangma thusehte ka mang hi.

⁵⁷TOPA aw, keima tanh nang na hi a; na thute mang dingin ka kiciam khin hi.

⁵⁸Ka lungsim neihzahin na maitang ka zong hi; nong ciamsa bangin kei hong hehpih siam in.

⁵⁹Ka lampite ka ngaihsun a, na ngeinakipte lam ah kong kalsuan hi.

⁶⁰Na thupiakte hong mang dingin ka kinawh dinga, ka ziakai kei ding hi.

⁶¹Migilote in khau-in hong hen uh zongin na thukham ka mangngilh kei ding hi.

⁶²Nangma thukham maante hangin lungdam ko dingin zankimin ka tho hi.

⁶³Nang hong kihtate le na thusehte a zuite khempeuh lawmpa ka hi hi.

⁶⁴Nangma itna leitung teng a dim hi, TOPA aw; na thukipte kei hong hilh in.

⁶⁵TOPA aw, nangma thu tawh kizui-in na nasempa tungah hong hoih in.

⁶⁶Na thupiakte um ka hi manin theihna le thukhenna hoih hong hilh in.

⁶⁷Ka thuaksiat ma-in lam ka pialkha zel a, ahi zongin tu-in na thu ka mang ta hi.

⁶⁸Nang na hoih a, na hoih na sem hi; na thukipte kei hong hilh in.

⁶⁹A kisatheite in zuauthu in hong mindaisak zongin na thusehte ka lungsim neihzahin ka zui hi.

⁷⁰Amaute lungtangte kheng a phamawhsak a neih loh uh hangin, na thukham ah nuam ka sa hi.

⁷¹Na thukipte ka sintheih nadingin kei adingin haksatna thuak a hoih hi.

⁷²Ngun le kham mal tul tampite sangin na kampana thukham kei adingin manphazaw hi.

⁷³Na khutte in keimah hong bawlin, hong siam a; na thupiakte sin theih nading theihtelna hong guan hi.

⁷⁴Nang thu ah lametna nei ka hih manin nang hong kihtate in kei hong muh uh ciangin nuam sa uh hen.

⁷⁵TOPA aw, na thukhamte maana na muanhuaina ah kei nong thuaksiatsak lam ka thei hi.

⁷⁶Na nasempa tunga na thuciamsa bangin na itna kip keima kihehnepna hi ta hen.

⁷⁷Nangma thukham ka nopsakna ahi manin ka nuntak nadingin na khuatuahna kei tungah hong tung ta hen.

⁷⁸A thu om lopi-a kei tung hong khial mi ki-uangsakte, a mai uh zumsak in; ke’n ka hileh nangma thusehte ka lungngaingai ding hi.

⁷⁹Nangmah hong kihta a na ngeinakip a theitelte kei lam hong nga uh hen.

⁸⁰Ka maizum loh nadingin na thukipte ah ka lungsim kawkbaang kei hen.

⁸¹Na hotkhiatna ngai-in ka hinna zawm a, ahi hangin na thu ah ka lametna ka nga hi.

⁸²Na thuciamna zongin ka mit ngui-a, "Cik ciangin kei hong hehnem ding na hiam?" ka ci hi.

⁸³Meikhu laka savun-um ka bang zongin na thukipte ka mangngilh kei hi.

⁸⁴Na nasempa in bang tanvei kong ngak lai kul ding hiam? Kei hong bawlsiate cik ciangin gawt ding na hi hiam?

⁸⁵Na thukham tawh kilehbulhin a ki-uangsakte in kei adingin gumkhuk a to uh hi.

⁸⁶Na thupiakte khempeuh a muantak hi; mite in a thu om lopi-in hong bawlsia uh ahi manin kei hong huh in.

⁸⁷Amaute in leitung panin hong siakkhia dekdek napi na thusehte ka taisan tuan kei hi.

⁸⁸Na itna tawh kizui-in ka nuntakna hong hawi in, tuateh na kama ngeinakipte ka mang ding hi.

⁸⁹TOPA aw, na kammal tawntung hi-a; vante ah a kip hi.

⁹⁰Na muanhuaina khang tawntungin kizom den hi; leitung na kipsaka a kipsuak hi.

⁹¹Na khempeuh in nangma’ na sem ahi manin na thukhamte tuni dongin kip den hi.

⁹²Na thukham ah nuamsa lo hileng ka gimthuakna ah ka mangthang ta ding hi.

⁹³Na thusehte-in ka nuntakna hong hawi na hi manin tuate ka mangngilh ngei kei ding hi.

⁹⁴Nangma aa ka hi manin hong hon in; na thusehte ka zongkhia khin hi.

⁹⁵Kei hong siasak dingin migilote in hong ngak uh hi, ahi hangin na ngeinakipte ka khingkhai ding hi.

⁹⁶Hoih kimna khempeuh ah ciangtanna ka mu-a; na thupiakte ahileh mong a nei kei hi.

⁹⁷Na thukham it mah si’ng maw! Sun nilohin ka lung ngaingai hi.

⁹⁸Na thupiakte in hong ompih den ahi manin ka galte sangin hong pilzawsak hi.

⁹⁹Na ngeinakipte lung ngaingai ka hi manin ka siate khempeuh sangin theihsiamna ka nei zaw hi.

¹⁰⁰Na thusehte mang ka hi manin upate sangin theihtelna ka nei zaw hi.

¹⁰¹Na thu ka man theih nadingin asia lampi peuhmah ka peel hi.

¹⁰²Nang mahmah in hong hilh khin na hi manin na thukhamte tawh ka kikhen kei hi.

¹⁰³Na thute khum mahmah a, ka kamah khuaizu sangin khumzaw tham hi!

¹⁰⁴Na thusehte panin theihtelna ka ngah a; tua ahi ciangin lampi maan lo peuhmah ka mudah hi.

¹⁰⁵Na thu in ka khe adingin meivakhi a, ka lampi ah khuavak ahi hi.

¹⁰⁶A thumaan na thukhamte a zui dingin thu ciamin ka kipsak khin hi.

¹⁰⁷Ka thuak sah khin hi; TOPA aw, na thu tawh kizui-in ka nuntakna hong hawi in.

¹⁰⁸TOPA aw, utna tawh ka kama kong phatna hong sang inla na thukhamte kei hong hilh in.

¹⁰⁹Ka nuntakna ka khutin ka tawi niloh zongin na thukham ka mangngilh kei ding hi.

¹¹⁰Migilote in thang hong siah taleh na thusehte panin ka pial nai kei hi.

¹¹¹Na ngeinakipte a tawntungin ka luah hi; tuate ka lungsim nopna ahi hi.

¹¹²Na thukipte atawp dong a zui dingin ka lungsim ka khentat hi.

¹¹³Lungka mite ka mudah a, ahi hangin na thukham ka it hi.

¹¹⁴Nang ka bukna le ka lum na hi-a; na thu ah ka lametna ka nga hi.

¹¹⁵Ka Pasian thupiakte ka zuih theih nadingin no a gilo-a gamtate paikhiamang un!

¹¹⁶Na thuciam tawh kituakin kei hong khuangkhoh in; tua hileh ka nungta ding hi; ka lametnate zahlaksak kei in.

¹¹⁷Kei nong letkip leh hong kihukhia dinga; nangma thukipte ka thusim tawntung ding hi.

¹¹⁸Na thukipte pana pialte’ zuauphuahna a mawkna ahi manin amaute khempeuh na nial hi.

¹¹⁹Leitunga migilote khempeuh sik-ek bangin na paikhia a; tua ahi ciangin na ngeinakipte ka it hi.

¹²⁰Nang hong kihta-in ka sa ling a; na thukhamte ka kihta hi.

¹²¹Thumaan le thutangin ka sem khin hi; hong nengniampa tungah kei hong nusia kei in.

¹²²Na nasempa hoih nadingin hong ciansak inla; a ki-uangsakte hong nuainetsak kei in.

¹²³Na hotkhiatna le amaan na thuciamna zongin ka mitte ngui hi.

¹²⁴Na itna tawh kituakin na nasempa tungah hong hih inla, na thukipte kei hong hilh in.

¹²⁵Nangma nasem ka hi hi; na ngeinakipte ka theihtel theih nadingin khentel theihna hong guan in.

¹²⁶TOPA aw, nang sepkhiat hun hi ta hi; na thukham kipalsatsat hi.

¹²⁷Kham le khamcitak sangin na thupiakte ka it zawk man le

¹²⁸na thusehte khempeuh maan hi, ci-a ka ngaihsut manin lampi maan lo peuhmah ka mudah hi.

¹²⁹Na ngeinakipte lamdang hi; tua ahi manin tuate ka mang hi.

¹³⁰Na thute lahkhiatna in khua vaksak a; mimawlte a theitelsak hi.

¹³¹Na thupiakte thei nuam lua-in kamka-in ka tungnak hi.

¹³²Na min a itte tungah na hih sasa bangin kei lam hong nga inla kei hong lainat in.

¹³³Na thu tawh kizui-in ka kalsuanna hong pi inla; mawhna khat beek kei hong uksak kei in.

¹³⁴Na thusehte ka man theih nadingin mite netniamna panin hong tankhia in.

¹³⁵Na nasempa tungah na maitang hong taan inla, na thukipte hong hilh in.

¹³⁶Na thukham a kiman’ loh manin ka mitte ah khitui hawk luang bang hi.

¹³⁷TOPA aw, nangmah na thumaan a na thukhamte a maan hi.

¹³⁸Na koihsa ngeinakipte maana a vekpi in muantak hi.

¹³⁹Ka galte in na kammalte thusim lo uh ahi manin ka aamluatna in kei hong patgawpsak hi.

¹⁴⁰Na thuciamnate sittel sinsensa hi-a, tua hangin na nasempa in tuate a it hi.

¹⁴¹Kei niam mahmah in hong kisimmawh zongin na thusehte ka mangngilh kei hi.

¹⁴²Na thumaanna a tawntung hi-a, na thukham amaan ahi hi.

¹⁴³Ka tungah lungkhamna le lungdonna hong tung ta leh na thupiakte ka nopsakna ahi hi.

¹⁴⁴Na ngeinakipte maan tawntung hi; ka nuntak theihna ding hong theitelsak in.

¹⁴⁵Ka lungsim khempeuhin kong sam hi; hong dawng in TOPA aw; na thukipte ka mang ding hi.

¹⁴⁶Nangmah kong sam hi; kei hong honkhia in na ngeinakipte ka zui ding hi.

¹⁴⁷Khuavak ma-in ka tho a, huhna ngenin kong kiko hi; na thu ah ka lametna ka nga hi.

¹⁴⁸Na thuciamte ka lungngaihngaih nadingin, zan vilte sung ka mit a hakhak hi.

¹⁴⁹Na itna tawh kituakin ka aw za inla; TOPA aw, na thukhamte tawh kizui-in ka nuntakna hong hawi in.

¹⁵⁰Gitloh sawm mite hong nai uh a, ahi hangin na thukham tawh a kigamla uh hi.

¹⁵¹Tua hi napi, TOPA aw, nang nong nai a, na thupiakte khempeuh thumaan hi.

¹⁵²Tuate a tawntunga na kipsaksa ahilam na ngeinakipte panin sawt pekin ka sin khin hi.

¹⁵³Na thukham mangngilh nai lo ka hi manin ka thuakna hong en inla kei hong hukhia in.

¹⁵⁴Ka thu hong panpih inla kei hong tankhia in; na thuciam tawh kizui-in ka nuntakna hong hawi in.

¹⁵⁵Migilote in na thukipte zongkhia lo uh ahi manin amaute le hotkhiatna kigamla hi.

¹⁵⁶TOPA aw, na khuatuahna lian mahmah hi; na thukhamte tawh kituakin ka nuntakna hong hawi in.

¹⁵⁷Hong bawlsia ka galte tampi hi-a, ahi hangin na ngeinakipte ka kiheisan kei hi.

¹⁵⁸A muanhuai lo mite in na thu mang lo uh ahi manin amaute enin ka kih hi.

¹⁵⁹Na thusehte ka itzia mu inla; TOPA aw, na itna tawh kituakin ka nuntakna hong hawisak in.

¹⁶⁰Na kammal khempeuh thumaan hi-a; amaan na thukhamte khempeuh a kimang den ding ahi hi.

¹⁶¹Gam-ukte in a thu om loin hong bawlsia uh a, ahi hangin na thu ah ka lungsim a ling hi.

¹⁶²Van kinusia tampi a mupa bangin na thuciam ah ka lung nuam hi.

¹⁶³Zuautatna mudahin ka kih a ahi hangin na thukham ka it hi.

¹⁶⁴Amaan na thukhamte hangin ni khatin sagih vei nangmah kong phat hi.

¹⁶⁵Na thukham a itte in lungmuanna lianpi nei uh a, bangmah in amaute a muktusak kei hi.

¹⁶⁶TOPA aw, na hotkhiatna ka ngak a, na thupiakte ka zui hi.

¹⁶⁷Na ngeinakipte it lua ka hi manin tuate ka mang hi.

¹⁶⁸Ka lampi khempeuh thei khin na hi manin na thusehte le na ngeinakipte thu ka mang hi.

¹⁶⁹TOPA aw, ka kikona na mai hong tung hen; na thu tawh kizui-in theihtelna hong guan in.

¹⁷⁰Kong ngetnopna na mai-ah hong tung hen; na thuciam bangin kei hong hukhia in.

¹⁷¹Na thukipte nong hilh manin ka muk pan phatna luanglet hen.

¹⁷²Na thupiakte khempeuh thumaan ahi manin ka leii in na thu la-in sa hen.

¹⁷³Na thusehte ka teel khit manin kei hong huh dingin na khut kigingsa in om hen.

¹⁷⁴TOPA aw, na hotkhiatna ka ngai-a, na thukham ah nuam ka sa hi.

¹⁷⁵Nang hong phat thei dingin hong nungtasak inla na thukhamte in kei hong khuangkhoh sak in.

¹⁷⁶Tuu mang bangin lam ka khial khin hi. Na thupiakte mangngilh lo ka hi manin, na nasempa hong zong in.