Read Zokam Phatna-late 129 Bible Online

Phatna-late 129 - Zokam bible

Phatna-late 129

¹Kahtohna la khat. Ka neu lai-a kipan amaute in hong nengniam lua uh hi - Israel in ci hen -

²ka neu a kipan amaute in hong netniam luat uh hangin kei tungah a gualzo kei uh hi,

³Lokhote in ka nungzang kho uh a, a tuma kuak uh a sausak uh hi.

⁴Ahi hangin TOPA thumaan a; migilote khauhualte attatin hong suaktasak hi.

⁵Zion a mudahte khempeuh maizumin kileh kik uh hen.

⁶Amaute, innkhum tunga lopa po a khanma-a keute bang uh hen;

⁷an lapa in tuate tawh a khut dim ngah loin a khawmpa in a ang dim a ngah zawh loh bang uh hen.

⁸Ama kiang a tawnte in, "TOPA thupha nang tungah hong tung hen; TOPA minin thupha kong pia uh hi," ci kei uh hen.