Read Zokam Phatna-late 135 Bible Online

Phatna-late 135 - Zokam bible

Phatna-late 135

¹TOPA phat un. d[211] TOPA min phat un; No TOPA’ nasemte

²no TOPA inn sunga nasemte, i Pasian inn huanga nasemte aw, amah phat un.

³TOPA hoih ahi manin TOPA phat un; nuam ahi manin a min phatna la sa un.

⁴Ahang in TOPA in ama adingin Jacob teel khin a, ama neihsa a goupi dingin Israel a teel khin hi.

⁵TOPA a liat lam ka thei-a, pasiante khempeuh sangin i Topa lianzaw hi.

⁶TOPA in vante sung le leitung ah, tuipite le a thukna munte khempeuh ah ama utut a bawl hi.

⁷Amah in leimongte pan meiite kahtosakin khuaphia le guah sawla, a kholna panin huih a puakkhia hi.

⁸Amah in Egypt-a ta masa, mihing ganhing ta masate, sattuk hi.

⁹Egypt aw, ama’n nang sung, Pharaoh le a nasemte khempeuh langah limte le nalamdangte a sawl hi.

¹⁰Amah in minamte tampi sattukin kumpi thahatte a that hi -

¹¹Amor-te kumpipa Sihon, Bashah kumpipa Og le Canaan kumpite khempeuh that a -

¹²a gam uh goutanh ding, a mi Israel-te goutanh dingin pia hi.

¹³TOPA aw, na min kip tawntung a, TOPA aw, khang sawnsawnte dongin a thang kikkik ding hi.

¹⁴Ahang in, TOPA in a mite tungah thu khenin a nasemte a khuatuah ding hi.

¹⁵Minamte’ milimte pen ngun le kham hi-a, mihing khuta kibawl ahi hi.

¹⁶Tua in kam nei napi pau thei lo a, mit nei napi khua a mu thei kei hi;

¹⁷tuate in bil nei napi khua za thei lo uh a, a kamun huu a sang tuan kei uh hi.

¹⁸Tuate a bawlte tuate tawh kibang dinga, tuate a muangte khempeuh zong tuate tawh kibang ding uh hi.

¹⁹Israel innkuante aw, TOPA phat un; Aaron innnkuante aw TOPA phat un;

²⁰Levi innkuante aw, TOPA phat un; no amah a kihtate aw, TOPA phat un.

²¹Zion panin Jerusalem-a a teng TOPA kiphat ta hen. TOPA phat un.