Read Zokam Phatna-late 140 Bible Online

Phatna-late 140 - Zokam bible

Phatna-late 140

¹Tumtheih makaipa ading. David phuah. Phatna-la khat. TOPA aw, mi tatsiate pan hong hukhia inla mi ngongtatte panin hong dal in;

²amaute in a lungsimun siatna sawmsim uh a, nisimin gal kidona a sosak uh hi.

³Amaute in gulpi aa bangin a leii uh hiamsak uh a; amaute muk ah mualtan gu a om hi.

⁴TOPA aw, migilote khut panin hong kem inla; kalhelh hong sawm mi ngongtatte panin hong dal in.

⁵Mi kiphasakte in thang hong siah uh a; amau lenthang khaukualte zakin ka lampi dungah thang a siah uh hi.

⁶TOPA aw, nang tungah, "Ka Pasian na hi hi," kong ci hi. TOPA aw, nong lainat ding kong ngetna hong za in.

⁷Thuneipen TOPA, kei hong hu a thahatpa, gal kido ni-a ka lutang liahpa aw -

⁸migilote deihna pia kei in TOPA aw; amau ngimnate gualzosak kei in; tua hi kei leh kiphasak ding uh hi.

⁹Kei hong umcihte’ lutangte, a muk uh gensa lungkhamnate in tuam ta hen.

¹⁰Amaute tungah mei-am lai zu henla; meikhuk sungah kikhulin a tho nawn lo dingin buannawi lakah kilawn hen.

¹¹Gam sungah gensiat hatte kikipsak kei henla; siatna in mi ngongtatte sabetin beng hen.

¹²Mizawngte adingin TOPA thutang a kip lam le a tasamte thu a letkip lam ka thei hi.

¹³Thumaante in na min phat ding uh a, a thutang mite na mai-ah nungta taktak ding uh hi.