Read Zokam Phatna-late 143 Bible Online

Phatna-late 143 - Zokam bible

Phatna-late 143

¹David phuah phatna-la khat. TOPA aw, kong thungetna za in, nong lainat ding ngena kong kikona hong za in; na muanhuaina le na thumaanna in kei hong suaktasak in.

²A nungta khat beek na mai-ah a thumaan om lo ahi manin na nasempa, thukhenna hong thuaksak kei in.

³Gal in kei hong delh-a, lei lakah hong sikzan hi; amah in sawtpi-a site bangin khuamial lakah hong tengsak hi.

⁴Tua ahi ciangin ka sunga ka kha thazawm a; ka sunga ka lungsim cimawh hi.

⁵Tanglai hunte ka phawk a, na sepsate lungngaingai-in na khuta na sepsate ka ngaihsunsun hi.

⁶Ka khutte nanglam ah kong zakkhia a; leikeu bangin ka hinna nang duhin a dangtak hi.

⁷TOPA aw, hong dawng mengmeng in; nang hong lunggulhin ka kha a zawm hi; na maitang hong selsan kei in nong selsan leh gum sunga kiasukte ka bang ding hi.

⁸Nangmah hong muang ka hi manin zingsang in na itna kip thu kei hong puak hen. Ka hinna nang tungah hong laamto ka hi manin ka pai nading lampi hong lak in.

⁹TOPA aw, nang sungah kong bu hi, ka galte pan hong hukhia in.

¹⁰Keima Pasian nang na hi manin na deihna ka hih ding hong hilh in; a hoih na Kha in leitaam tung ah hong pi hen.

¹¹Na min na khualna-in TOPA aw, ka nuntakna hong hawisak in; na thumaanna-in lungkhamna pan hong paikhiatpih in.

¹²Na itna kip hangin ka galte daisak in; nangma nasem ka hi manin ka galte khempeuh susia khin in.