Read Zokam Phatna-late 147 Bible Online

Phatna-late 147 - Zokam bible

Phatna-late 147

¹TOPA phat un. b[223] Eite Pasian phatna-a lasak hoih mahmah a, amah phat dingin kilawma nuam mahmah hi!

²TOPA in Jerusalem lam-a; Israel saltaangte a kaikhawm hi.

³Amah in lungsim tamkhamte damsak a, amau liammate a tunsak hi.

⁴Amah in aksite a phazah ding ciangtan a, a min vawh ciatin sam hi.

⁵I Topa lian hi, vangliatna ah thahat a, ama theihtelna kiciangtan lo hi.

⁶TOPA in a kiniamkhiatte huh a migilote ahileh leilak a denna hi.

⁷Lungdam koin TOPA la sak un; Harp tumin i Pasian tungah gingsak un.

⁸Amah in meiite tawh huih khua tuam a, leitung ah guah zusakin mualte tungah lopa posak hi.

⁹Amah in ganhonte le va-aknote a ham ciangin an a sik hi.

¹⁰Ama lungkimna, sakol hatna hi lo a, ama nopsakna mihing khete zong hi lo hi.

¹¹TOPA nopsakna ahileh amah kihta a, ama itna kip a lamente tung ahi hi.

¹²Jerusalem aw, TOPA tawisang in; Zion aw, na Pasian phat in,

¹³ahang in, amah in na kongpi zawlte khauhsak a, nang sunga om na mite thupha pia hi.

¹⁴Amah in na gamgite lemna pia-a, mangbuh hoih penin nang hong taisak hi.

¹⁵Amah in a thupiakna leitung ah sawl-a; a thu manlangtakin a tai hi.

¹⁶Amah in tuumul bangin vuk phalh a, vut bangin vukkhalte a thehthang hi.

¹⁷Amah in suangtang bangin a gialtang hong khiatsuk hi. Ama vuk-huih kua in nang zo ding hiam?

¹⁸Amah in thu pia a tuate a tuisuak hi; a huihdamte tok-a tui a luang hi.

¹⁹Amah in Jacob tungah a thu laakhia a, Israel tungah a thukhamte le a thukipte a laakkhia hi.

²⁰Amah in minam dangte adingin hih na sem lo a; amaute in a thukhamte a thei kei uh hi. TOPA phat un.