Read Zokam Phatna-late 17 Bible Online

Phatna-late 17 - Zokam bible

Phatna-late 17

¹David thungetna khat. TOPA aw, amaan a kong thumna hong za in; ka kikona na ngai in. Ka thungetna na bil na ngat in - tua in zuauthei muk pan ahi kei hi.

²Nang kiang pan ka diktanna hong pai ta hen; na mitte in thumaan mu ta hen.

³Ka lungtang kanin zanin kei nong sittel zongin, kei nong zia-et hangin bangmah na mu kei ding hi; ka kam a mawh lo dingin ka khentat khinzo hi.

⁴Mihing nasepte tawh kisai-in ahileh - na muk pana kammal hangin a ngongtatte lampi pan keimah ka kikem hi.

⁵Nangma lampite ah ka kalsuan-a; ka khete a tal kei hi.

⁶Pasian aw, hong dawng ding na hi manin nang kong ko hi; na bil kei lam hong ngat inla kong thungetna hong za in.

⁷Nangma khut taklama hong honpa aw, amau galte panin nang hong beelte na itna lianpi a lamdanna lak in.

⁸Na mit nauta bangin kei hong kem in; na kha liim nuai-ah kei hong sel inla,

⁹kei hong sim migilote le kei hong umcih thah hong sawm a sithei ka galte panin hong sel in.

¹⁰Amaute in a lungtang kheengte khakcip uh a, a kamte un kiphatsakna kam a pau uh hi.

¹¹Amaute in kei hong sul zuih uh a tu-in hong umcih in leilak denna dingin hong mitsuan gega uh hi.

¹²Amaute, sa man nuam humpinelkai gilkial bang uh a, sagem a bok humpinelkai lianpi tawh kibang uh hi.

¹³Tho in, TOPA aw, amaute maituah a lei denna in; nangma namsau-in migilote pan kei hong hukhia in.

¹⁴TOPA aw, leitung nuntakna mah amau lawhtak ahipah, hih leitung mite panin nangma khutin hong honkhia in. Na it kepte gilkialna na daisak a, a tapate un tampi nei-in a tate ading hauhna a kholsak lai uh hi.

¹⁵Kei ka hi leh - thumaanna hangin na maitang ka mu ding hi; ka khanlawh ciangin nang tawh kibatna mu in ka lungkim ta ding hi.