Read Zokam Phatna-late 18 Bible Online

Phatna-late 18 - Zokam bible

Phatna-late 18

¹Tumtheih makaipa ading. TOPA nasem David la. TOPA in a galte khempeuh khut pan le Saul khut sung pan a hutkhiat ciangin David in hih lamalte TOPA a sak hi. Amah in: Keima thahatna TOPA aw, nang kong it hi.

²TOPA in ka suangpi hi-a, ka kulhpi le kei hong hukhiapa ahi hi; ka Pasian ka suangpi hi-a, ka belhpa ahi hi. Amah ka lum le ka hotkhiatna ki a[31], ka kulh muanhuai ahi hi.

³A phattak TOPA ka sam a, ka galte panin kei hong honkhia hi.

⁴Sihna khauhualte in kei hong vialcip a, siatna tuihualte in kei hong tuumcip uh hi.

⁵Hankhuk b[32] khauhualte in ka kimkot ah hong vial-a; sihna thangte in kei hong maituah uh hi.

⁶Ka lungdon hunin TOPA ka sam hi; ka Pasian tungah huhna ngenin ka kiko hi. Amah in a biakinnpi panin ka aw na za a; ka kikona a mai-ah tungin a bilin a za hi.

⁷Lei lingin kilok a, mual bulpite a kising hi; amah heh ahi manin amaute a ling uh hi.

⁸Ama nakvangte panin meikhu suakto a; a kam panin a hultum thei mei suakkhia in, tua panin mei-amte a kuangkhia hi.

⁹Amah in vante phenvangin hong kumsuk a; a khenuai-ah meii vomte a om hi.

¹⁰Amah cherub-te tungah tuangin leng a; huih khate tung sangpi-ah a leng hi.

¹¹A kikhuh nadingin khuamial bawl a, ama kimkot ah van guah meii vomte-in a ki-umcih hi.

¹²Ama omna tanna panin meiite, gialtangte le kektangte tawh a pusuakkhia hi.

¹³Van panin TOPA in van gingsak a, Sangpen Pa’ aw in a thawn kik c[33] hi.

¹⁴Amah in a thaltangte kap a galte a kithehthangsak hi, kektang lianpite khiata, amaute a nawhkek hi.

¹⁵TOPA aw, taihilhin na nakvang pan huu na phit ciangin tuipi kuamthukte kipholak a, lei kingakna bulpite kidawk hi.

¹⁶Amah in a sangna pan kei hong zamsukin hong len a; tuithukte pan hong kaikhia hi.

¹⁷Amah in a vanglian ka galpa pan le kei adingin a hatlua ka galte panin hong hukhia hi.

¹⁸Amaute in ka tuahsiat ni-in hong maituah uh hangin, kei hong huhpa TOPA ahi hi.

¹⁹Amah in mun tanzau khatah hong tun a; kei tungah lungkim ahi manin kei hong hukhia hi.

²⁰Ka thumaanna tawh kituakin TOPA in hong din kik a; ka khutte a sianthona tawh kizui-in pahtakman hong pia hi.

²¹TOPA’ lampite tawn ka himanin; ka Pasian pan kihei-in a sia ka bawl kei hi.

²²A thukhamte khempeuh ka mai-ah om a; ama thukipte ka pialsan kei hi.

²³Ama mai-ah ka genbaang kei a mawhna pan ka kikem hi.

²⁴TOPA in ka thumaanna tawh kizui le ama muhna ah ka khutte a sianthona tawh kizui-in pahtakman hong pia zo hi.

²⁵A muanhuaite tungah na muanhuaina na lak a, a kawkbaang lote tungah na kawkbanglohna na lak a,

²⁶a siangthote tungah na sianthona lakin, a thukawite tungah ahileh na khelteina na lak hi.

²⁷A kiniamkhiatte na honkhia-a, a kiphatsak mithahte na niamkhiat hi.

²⁸TOPA aw, nang in ka meivak na kuangsak den a, ka Pasian in ka khuamial khuavak na suaksak hi.

²⁹Nangma huhna tawh galkap honpi d[34] ka sim thei dinga ka Pasian tawh kulh ka kantan thei ding hi.

³⁰Pasian aa in ama lampi hoihkim a; TOPA kammal in melhemna a nei kei hi. Amah a beelte khempeuh adingin amah lum ahi hi.

³¹Ahang in, TOPA lo Pasian dang kua ahi hiam? Eite Pasian longal Suangpi kua ahi hiam?

³²Thahatna hong guana ka lampi a hoihkimsakpa Pasian ahi hi.

³³Amah in ka khete sazukpi khe bangsak a; asannate ah kei hong dingsak zo hi.

³⁴Amah in galsim dingin ka khutte pantah a; ka bante in sumngo thalpeu a kek zo hi.

³⁵Gualzawhna lum kei nong pia a, na khut taklam in kei hong lencipin; kunsukin kei nong liansak hi.

³⁶Ka siakmit a kilawi loh nadingin ka nuai-ah ka lampi na zaisak hi.

³⁷Ka galte delhin amaute ka pha hi; amaute a kisiat khit mateng ka kileh kik kei hi.

³⁸A tho zo nawn lo dingin ka tuanzan a; ka khe nuai-ah amaute a puk uh hi.

³⁹Gal sim nadingin thahatna nong guan a; kei hong dote ka khephung ah na kunsak hi.

⁴⁰Ka galte lau-in na lehtaisak a, kei hong dote ka susia hi.

⁴¹Amaute huhna ngenin kiko uh a, a hon ding lah a om kei hi - TOPA ko uh a, aman lah a dawng kei hi.

⁴²Amaute huih mutmang dingin leivui bangin ka vuisak a; kongzing buannawi bangin ka buakhia hi.

⁴³Mite hong simna panin kei nong hukhia a; minamte’ lutang nong hisak khin hi; ka theih ngei loh mite in ka na a sem uh hi.

⁴⁴Amaute in ka thugen a zak phetun ka thu mang uh a; gamdang mite in kei hong maivil uh hi.

⁴⁵Amaute lungneu uh a, a kulh muanhuaite panun, ling kawmin hong pai uh hi.

⁴⁶TOPA nungta hi! Ka Suangpi kiphat hen! Ka Honpa Pasian kitawisang hen!

⁴⁷Amah ka phu hong laksakpa, minamte hong nuaisiahsakpa,

⁴⁸ka galte pana hong honkhiapa Pasian ahi hi. Ka galte tunglam ah kei nong tawisang a, a ngongtat mite panin nong hukhia hi.

⁴⁹Tua ahi ciangin TOPA aw, minamte lakah nang kong phat dinga; na min phatin la ka sa ding hi.

⁵⁰Amah in a kumpipa nakpi in gualzosak a; amah in a sathau-nilhpa David le ama suante tungah a migitna kip a lak tawntung hi.