Read Zokam Phatna-late 21 Bible Online

Phatna-late 21 - Zokam bible

Phatna-late 21

¹Tumtheih makaipa ading. David phatna-la khat. TOPA aw, nangma hatna sungah kumpipa nuamsa hi. Nangma piak gualzawhnate nuam sa mahmah ei!

²Ama lungsim deihna amah na pia a’ a mukte hong ngetna na deek kei hi.

³Thupha tampi tawh amah na muak-a, a lutungah kham citak kumpi lukhu na khusak hi.

⁴Amah in nuntakna hong ngena ama nite a tawntungin na sawtsak den hi.

⁵Na piaksa gualzawhnate tawnin ama minthanna lian mahmah a; nang in thupina le nopcitna ama tungah na khusak hi.

⁶Tawntung thuphate amah na pia khin takpi a, nangma ompih lungnopna-in na kipaksak zo hi.

⁷Kumpipa in TOPA muang ahi manin, Sangpen Pa itna kip hangin amah a kiling kei ding hi.

⁸Nangma khut in na galte khempeuh len dinga; na khut taklam in nang hong dote a man ding hi.

⁹Na kilat hun ciangin amaute pummei na bangsak ding hi. TOPA thangpaihna in amaute nawmvalh dinga, ama mei in amaute a hultum ding hi.

¹⁰Amau suante leitung pan na siasak dinga, amau khangsawnte mihing panin na phiatmang ding hi.

¹¹Nang tungah gitloh a sawmsim uh zongin, a sawm uh gitloh geelna a lawhcing thei kei ding hi;

¹²ahang in, thal keksa tawh amaute na ngim ciangin na lehtaisak ding hi.

¹³TOPA aw, na thahatna ah hong kitawisang hen; kote in la sa in na hatna ka phat ding uh hi.