Read Zokam Phatna-late 25 Bible Online

Phatna-late 25 - Zokam bible

Phatna-late 25

¹David phuah. TOPA aw, nang tungah ka hinna kong laamto hi;

²keima Pasian aw, nang kong muang hi. Kei hong maizumsak kei inla, ka galte kei tungah gualzosak kei in.

³Nang sungah lametna a neite khat beek kimaizumsak ngei lo dinga, ahi hangin a thu om lopi-a a zuautatte a kimaizumsak ding hi.

⁴TOPA aw, nangma ziate kei hong lak inla na lampite kei hong hilh in;

⁵nangmah Pasian, keima Honpa na hi-a, sun niloh a ka lametna na hi manin na thutak ah hong pi inla kei hong hilh in.

⁶Na lainatna lian le na itna liante tanglai pek pan ahi manin phawk in, TOPA aw.

⁷Ka khangno lai-a ka mawhnate le ka lehtatnate ciamteh kei in; TOPA aw, nang hoih na hi manin na itna tawh kizui-in kei hong phawk in.

⁸TOPA hoih in thutang hi; tua ahi manin mawhneite ama lampite a lak hi.

⁹Amah in a kiniamkhiatte amaanin pi-a, amaute ama lampi a hilh hi.

¹⁰Ama thukhun sawlnate a zuite adingin TOPA’ lampite khempeuh itna le muanhuaina ahi hi.

¹¹Nangma min na khualna-in TOPA aw, ka khialhnate a liat hangin hong maisak in.

¹²Tua ahileh TOPA a kihta kua ahi hiam? Amah in ama adingin a teelsaksa lampi a lak ding hi.

¹³Amah a dam sung teng daupaina-in zang dinga, ama suante in leitang a luah ding uh hi.

¹⁴TOPA in amah a kihtate muang a; a thukhun amaute a theisak hi.

¹⁵TOPA in thang panin ka khete hong sutsak lel ding ahi manin amah ka mitsuan gige hi.

¹⁶Lungzuang in kei guak gim thuak ka hi manin kei lam hong nga inla hong hehpih in.

¹⁷Ka lungsim buainate kibehlaplap hi; ka lungtawlna panin hong suaktasak in.

¹⁸Ka thuaksiatna le ka lungdonna en inla, ka mawhna khempeuh lakhia mang in.

¹⁹Ka galte khang mahmah in hong muhdahna uh a nasiat mahmah lam mu in!

²⁰Ka nuntakna hong cingin hong hu in; nang hong beel ka hi manin hong maizumsak kei in.

²¹Ka lametna nang sungah om ahi manin ka lungsim cihtakna le ka thutangna in kei hong dal hen.

²²Pasian aw, amau lungkhamna khempeuh panin Israel tankhia in!