Read Zokam Phatna-late 28 Bible Online

Phatna-late 28 - Zokam bible

Phatna-late 28

¹David phuah Keima Suangpi TOPA aw, nang kong sam hi; keilam ah na bil ngongsak kei in. Ahang in dai dide in na om leh gum sunga kiasuksate ka bang ding hi.

²Na Mun Siangtho Pen lamah ka khutte lamto-in, nong huh ding kong nget bangin hong lainatin kong kikona hong za in.

³Migilote le a gitloh gamtatte, a vengte kamnemin hopih napi amau lungsim ah huatna a kholte tawh hong kaikhia khawm kei in.

⁴Amaute gamtatnasate le a gamtatsiate uh thuk kik in; a khutun a sepnate uh thuk inla amaute tawh kituakin amau tungah tusak in.

⁵Amaute in TOPA nasepte a khuta a sepsate a thusim loh nungsangun amaute phelkhia dinga, a lam kik ngei nawn kei ding hi.

⁶Hong lainat ding ngenin ka kikona hong za khin ahi manin TOPA kiphat ta hen.

⁷TOPA in ka hatna le ka lum ahi hi; ka lungsim in amah muanga, keimah hong kihuh hi. Ka lungsim nuamin dianga, la sakin ama tungah lungdam ka ko ding hi.

⁸TOPA in ama mite’ thahatna hi-a, ama sathau-nilhpa adingin hotkhiatna kulhpi ahi hi.

⁹Nangma mite hon inla na gouluahte thupha pia in; amaute tuucin-a cingpa hi inla, tonpih tawntung in.