Read Zokam Phatna-late 31 Bible Online

Phatna-late 31 - Zokam bible

Phatna-late 31

¹Tumtheih makaipa ading. David phatna-la khat. TOPA aw, nang kong bel khinzo hi; hong maizumsak ngei kei in; na thumaanna-in hong hukhia in.

²Na bil kei hong ngat inla hong hu dingin hong pai meng in; ka bukna suangpi le kei hong hon kulhpi muanhuai hong hi in.

³Nangmah ka suangpi le ka kulhpi na hi nungsang, nangma min na khualna-in hong makaihin hong pi in.

⁴Keima belh nang na hi manin kei hong kisiahna thang panin hong khahkhia in.

⁵Nangma khut sungah ka kha kong ap hi; thutak Pasian TOPA aw, keimah hong tankhia in.

⁶Kimanna nei lo milim belte ka mudah a; TOPA kong muang hi.

⁷Ka thuaksiatna mu khinin ka hingimna thei khin na hi manin na itna sungah nuamin ka kipaak ding hi.

⁸Galpa tungah kei nong pia kei a, mun nuam ah ka khe na dingsak zaw hi.

⁹Ka lungdong ta hi TOPA aw, kei hong lainat in; dahna-in ka mit ngui a, ka hinna le ka pumpi bah ta hi.

¹⁰Ka nuntakna lunggimna in valhtum a, mauna in ka nuntak sung kumte gai ta hi; ka thuaksiatna a[56] hangin ka thahatna kiam-a ka guhte zaw hi.

¹¹Ka galte khempeuh hangin ka inn vengte simmawh ka suaka, ka lawmte aa-in gimneih ka suak hi - kongzinga kei hong mute in hong taisan uh hi.

¹²Kei a sisa bangin amaute in hong manggilh uh a; leibeel kitamsa tawh ka kibang hi.

¹³Tampi hong gensiatna za ka hi manin, ka kim ka pam a lauhuai hi; amaute in kei hong sawmsim uh a, ka nuntakna lak a sawm uh hi.

¹⁴Ahi hangin TOPA aw nangmah kong muang hi; "Keima Pasian na hi hi," kong ci hi.

¹⁵Ka hunte nang khut sungah om hi; ka galte le kei hong nungdelhte panin hong hukhia in.

¹⁶Na nasempa tungah na mai hong tangsak inla; nangma itna kipin hong honkhia in.

¹⁷Nang tungah hong kiko khin ka hi manin, TOPA aw, kei hong maizumsak kei in; migilote ahileh maizumsak inla, hankhuk b[57] sungah daitakin sial in.

¹⁸Amaute in kisaktheihna le misimmawhna tawh a thumaante langkhat ah ki-uangsakin kampau uh ahi manin amau zuauphuahna mukte daisak in.

¹⁹Nang hong kihtate adingin na kholsak nangma hoihna lian mahmah a, nang hong beelte tungah mite mitmuhin na piak ahi hi.

²⁰Mihingte sawmsimna panin na omna liim sungah amaute na seel a; mawhsakna leiite panin nangma omna sungah amaute bittakin na kem hi.

²¹A ki-umcih khuapi sungah ka om ciangin ama itna lamdang kei hong lak ahi manin TOPA kiphat ta hen.

²²Patausa in, "Nang mitmuhna pan kei hong kikhenkhia ta ei!" ka ci hi. Tua hi napi hong huh dinga kong sap ciangin, lainatna ngena ka kikona nong za hi.

²³Ama misiangte khempeuh in TOPA it un! TOPA in a muanhuaite kembit a, a kisatheite ahileh cingtakin a thuk kik hi.

²⁴TOPA a lamen khempeuh aw, kihatsakin kilungkhauhsak un.