Read Zokam Phatna-late 32 Bible Online

Phatna-late 32 - Zokam bible

Phatna-late 32

¹David phuah. c[58] khat. A tatkhialhnate kimaisak a, a mawhna a kikhuhsak mi thupha ngah ahi hi.

²TOPA in ama mawhna a khuksak loh mi, a lungsim ah khemna a paii lo mi, thupha ngah ahi hi.

³Sun thapai-a ka maumauna hangin ka daih dide ciangin, ka guhte a teemgawp hi.

⁴Sun le zanin ka tungah na khut gik ahi manin; khuakhal nisa bangin ka hatna a hupkang hi.

⁵Tua ciangin ka mawhna nang kong theisak a, ka khialhna ka im kei hi. "Kei tatkhialhnate TOPA tungah kong pulak ding hi," ka ci-a - tuateh nang ka khialhna hanga mawhsakna nong maisak hi.

⁶Tua ahi manin a pasian-mi peuhmah in muh theih a na om sungin nang tungah thu hong ngen ta uh hen; tua hileh tuihat a khan ciangin amaute a bankha peuhmah kei ding hi.

⁷Ka bukna mun nang na hi hi; lungkhamna pan hong dal inla hutkhiatna late in nong umcih ding hi.

⁸Na pai nading lampi hong lak-in kong hilh ding hi; thu hong hilhin kong cing ding hi.

⁹Theihtelna a nei lo sakol peuh laa peuh tawh kibang kei in, tua bangte satna le kamkaih tawh uk kul ding hi; tua hi kei leh nang kiangah hong pai kei ding uh hi.

¹⁰Migilote’ gimna tampi hi-a, TOPA a muang mite ahileh ama itna kip in a umcih hi.

¹¹No a thumaante lungnuamin TOPA sungah kipak un; no lungsima thutangte khempeuh aw, la sa un!