Read Zokam Phatna-late 33 Bible Online

Phatna-late 33 - Zokam bible

Phatna-late 33

¹No a thumaante aw, lungnuamtakin TOPA la sak un; amah a thutangte phat dingin kilawm hi.

²Harp-in TOPA phat unla; khauzang sawm kivawh lyre amah tum un.

³Amah lathak sak unla; kilawmtakin tum unla nuamin kiko un.

⁴Ahang in, TOPA kammal maanin thumaan a; a hihna khempeuh ah muanhuai hi.

⁵TOPA in thumaanna le thutang it a; ama itna kip leitung dim hi.

⁶TOPA thu-in vante kibawl-a - amau aksi honpite ama huusan tawh kibawl ahi hi.

⁷Amah in beelte a[59] sungah tuipi tuite khawm a; vankholna innte ah tui thukpi a koih hi.

⁸Leitung khempeuh in TOPA kihta henla; leitung bup a mi khempeuh in amah zahtak uh hen.

⁹Ahang in, amah pau-a a cih bangin piang hi; amah in thu pia-a dingkip hi.

¹⁰TOPA in minamte’ ngimnate guaksuaksak a, mite sawmnate a dal hi.

¹¹Ahi hangin TOPA geelnate kipden a, a lungsima a ngimnate akhang a khangin kip tawntung hi.

¹²Amaute Pasian TOPA hi-a a gouluah dinga a teel mite, thupha ngah minam ahi hi.

¹³Van panin TOPA in ensuk a, mihing khempeuh a mu hi;

¹⁴ama tenna - mun panin leitunga teng khempeuh a vil gige hi -

¹⁵amah in mi khempeuh lungsim bawl a, amaute sepna khempeuh a entel hi.

¹⁶A galkap hauh thu-a kihonkhia kumpi om lo a; ama thahat thu-a suakta galhang a om kei hi.

¹⁷Kihut nadingin sakol muan, a mawknapi hi-a; a hat mahmah hangin a honkhia zo tuan kei hi.

¹⁸Ahi hangin TOPA mit in amah a kihtate, ama itna kip a lamente mitsuan a,

¹⁹sihna pan amaute hukhia in kialpi hun ciangin amaute kema a nungta uh hi.

²⁰TOPA lamenin i ngak hi; amah eite huhpa le i lum ahi hi.

²¹Ama min siangtho muang i hi manin ama sungah i kipak hi.

²²TOPA aw, nang sungah lametna kong neih mah bangun na itna kip ko tungah hong khawlsak in.