Read Zokam Phatna-late 34 Bible Online

Phatna-late 34 - Zokam bible

Phatna-late 34

¹David phuah. Amah a hawlkhia Abimelech mai-ah mihai a kineih a a paisan hun lai. Hun khempeuh ah TOPA ka tawisang dinga; amah phatna ka mukte tawh a kitalawi kei ding hi.

²Ka hinna TOPA sungah kisathei ding hi; gim thuakte in za uh henla kipak uh hen.

³Kei tawh TOPA’ min thangsak khawm un; ama min tawisang khawm ni.

⁴TOPA ka zonga aman kei hong dawngin; ka launa khempeuh panin hong hukhia hi.

⁵Amah mitsuante maitaang uh a; amau maitangte zumna in a khuh ngei kei hi.

⁶Hih mizawngpa in sam a, TOPA in a za hi; ama lungkhamna khempeuh panin a honkhia hi.

⁷TOPA a kihtate kimkot ah vansawltak in giahphual sat-a, amaute hukhia hi.

⁸TOPA hoih hi, ciam unla mu dih un; amah beel mi thupha ngah ahi hi.

⁹Amah kihtate bangmah kisam lo ahi manin no ama misiangte aw, TOPA kihta un.

¹⁰Humpinelkaite thanemin gilkial thei uh hi; ahi hangin TOPA a zongte na hoih bangmah a tasam kei uh hi.

¹¹Ka tate aw, hong pai-in ka thu ngai un; TOPA kihtakzia note kong hilh ding hi.

¹²A nuntakna it a ni hoih tampi a mu nuam peuhmah in,

¹³gitlohna panin na leii uh kem unla, zuau genna panin na muk uh kem un.

¹⁴Gitlohna kiheisan unla na hoih sem un; kilemna zong unla delh un.

¹⁵TOPA’ mitte, a thumaante tung tu-a, ama bilte in a kikona uh ngai gige hi;

¹⁶siatna bawlte, amaute kiciamtehna leitang pan a phiatkhia dingin TOPA in maingatin a sal gige hi.

¹⁷A thumaante kiko peuh leh TOPA in za a; amau lungkhamna khempeuh panin amah in hukhia hi.

¹⁸Lungtang kitamkhamte kiangah TOPA nai a, a lungsim kitamzante honkhia hi.

¹⁹A thumaan mi in lungkhamna tampi nei thei hi, ahi hangin TOPA in tuate khempeuh panin a hukhia hi;

²⁰ama guhte khempeuh hutsak a, tuate khat beek a kitan kei ding hi.

²¹Siatna in migilote that dinga; a thumaan mi’ galte a kimawhpaih ding hi.

²²TOPA in ama nasemte tankhia a; amah a beelte khat beek a kimawhpaih kei ding hi.