Read Zokam Phatna-late 35 Bible Online

Phatna-late 35 - Zokam bible

Phatna-late 35

¹David phuah. TOPA aw, kei hong langpangte langpan inla, ka langa hong dote do in.

²Lum le lum neu la inla, tho in kei hong huh in.

³Kei hong delhte langkhatah teipi le teikhawh a[60] lek in. Ka hinna kiangah, "Na kihotkhiatna keimah ka hi hi," ci in.

⁴Ka nuntakna a zongte maimawlin maizumsak in; ka siat nadinga sawmsimte lungmangin ciah kik uh hen.

⁵TOPA vansawltak in a nawhmang amaute huihmut leng buhvai bang uh hen;

⁶TOPA vansawltak in a delh amaute lampi mialin nal ta hen.

⁷A thu om lopi-in a len uh hong siahsim leh a thu om lopi-in kei gum hong siah nungsangun

⁸amaute theih kholh lohin siatna in pha henla - amau hong siahna lenthang in vialcipin a siat nadingun gum sungah kia uh hen.

⁹Tua ciangin TOPA sungah ka hinna lungnuam dinga, ama hotkhiatna sung nuam ka sa ding hi.

¹⁰Ka nuntakna buppi-in lamdang sa in, " TOPA aw, nang bang kua om ahi hiam? Nang in amaute adingin a hatluate panin mizawngte na hukhia-a, amaute a lawkte panin mizawngte le a tasamte na hukhia hi," a ci ding hi.

¹¹A hiam gamh tecite maipaikhia uha, a thu bangmah ka theih loh nate hong dong uh hi.

¹²A hoihte, a hoih loin hong thuk uh a, khavapi-in ka hinna nusia uh hi.

¹³Tua hi napi amaute a cinat uh ciangin ippi puan ka silh a, kiniamkhiatin an ka tang hi. Ka thungette dawn lohin hong kileh kik ciangin

¹⁴ka lawmpa ahikeh ka sanggampa ading bangin ka thum hi. Ka nu ka kah bangin dahin ka kun hi.

¹⁵Ahi hangin ka muktuk ciangin amaute kilawpin kikhawm uh a; ka phawk loh kalin kei hong simte ka langah a kikhawm uh hi. Amaute in tawlnga loin kei hong gensiasia uh hi.

¹⁶Huatna lianpi tawh pasian-milote bangin hong zahko a[61] uh a; a ha uh hong gawisan uh hi.

¹⁷Topa aw, bangtan hong enkhong lai ding na hi hiam? Amau siatmangsakna panin ka nuntakna hu inla hih humpinelkaite panin a manpha ka nuntakna hukhia in.

¹⁸A kikhawm mi tampi lakah lungdam kong ko dinga, mihon tampitakte lakah nang kong phat ding hi.

¹⁹A thu om lopi-in kei tungah ka galte kisialsak kei inla, thu om lopi-in kei hong mudahte kimitsin simsak kei in.

²⁰Amaute in lem thu lah gen loin gam sungah daitaka omte mawhsiat ding bek a sawm uh hi.

²¹Kei hong nehphensanin, "Awi bek si’ng! Awi bek si’ng! Eima mit mahmah in mu ta hang ei!" ci uh hi.

²²TOPA aw, hih na mu khin ta hi; dai nawn kei in. Kei hong gamla omsan kei in, Topa aw,

²³Ka kihut nadingin khanglo inla tho ta ve! Kei adingin do in, keima Pasian Topa aw.

²⁴Keima Pasian TOPA aw; nangma thumanna ah kei dik hong tangsak inla kei tungah amaute kisialsak kei in.

²⁵Amaute in, "Awi bek si’ng, i deih bang lian hi ei!" ci-in ngaihsunsak kei inla, "Amah valhtum ta hang ei!" cisak kei in.

²⁶Kei lungdonna hangin a kisatheite khempeuh maizumin kibuaisakgawp henla; kei tunga amau le amau a kisangsakte khempeuh maizumna le maimawlna kisilhsak hen.

²⁷Kei diktanna ah nuam a sate nuamin kipakin awng uh hen, amaute in a tawntungin, "A nasempa hoihna ah nuam a sa TOPA kitawisang hen," ci uh hen.

²⁸Sun thapai-in ka leii in na thumaanna le na phatnate a gen ding hi.