Read Zokam Phatna-late 37 Bible Online

Phatna-late 37 - Zokam bible

Phatna-late 37

¹David phuah. Misiate hangin lunghimawh kei inla, amaan lo-a gamtate eng kei in;

²ahang in, amaute lopa bangin vul pak ding uh a, singno hing bangin amaute si baih ding uh hi.

³TOPA muangin na hoih sem in; gam sungah tengin a muanhuai lonona nuamsa in.

⁴Nangmah in TOPA sung nuamsa lecin na lungsima na lunggulhte hong pia ding hi.

⁵TOPA tungah na vai ap-in; amah muang in, ama’n a sem ding hi.

⁶Amah in na thumaanna zingsang khuavak bangin tangsak dinga, na thutangna sun nitang bangsak ding hi.

⁷TOPA mai-ah om hithiat inla lungduaitakin amah ngak in; mihingte amau lampite ah a lawhcin uh ciang leh gitloh a sawmnate uh a hih zawh uh ciangin lunghimawh kei in.

⁸Hehna ki-ip inla thangpaihna kiheisan in; lunghimawh kei in - tua in gitlohna tun lel hi.

⁹Ahang in, misiate kipuakoih dinga, ahi hangin TOPA ah lametna neite in gam a luah ding uh hi.

¹⁰Migilote tomkha sungin om nawn lo dinga; amaute na zon hangin kimu lo ding hi.

¹¹Ahi hangin lungnemte in gam luah ding uh a lungmuanna lianpi nuam a sa ding uh hi.

¹²Migilote in thumaante langpan sawm uh a, amaute hagawisan uh hi;

¹³ahi hangin Topa in migilote ni a tun ding thei ahi manin amaute nuihsan hi.

¹⁴Migilote in mizawngte le a tasamte nuainet ding, a gamtatna-a thutangte that dingin namsau dokin thal a kek uh hi.

¹⁵Ahi hangin a namsaute un amau lungtang mah dawtlet dinga, a thalte uh a kisutan ding hi.

¹⁶Migilo tampite hauhna sangin, a thumaante in tawmkha a neih uh hoihzaw hi;

¹⁷ahang in, migilote vangliatna kisutan dinga, thumaante ahileh TOPA in a lenkip ding hi.

¹⁸A kawkbaang lote’ nite TOPA in thei a, amau gouluah a kip den ding hi.

¹⁹Tuahsiat hunin amaute dual lo ding uh a, kialpi hunin tampi nei-in nuam a sa ding uh hi.

²⁰Ahi hangin migilote kisia dinga; TOPA galte gamlak mel hoihte bangin mangthang ding uh a - meikhu bangin a mangthang ding uh hi.

²¹Migilote in leitawi-in din kik lo uh a, ahi hangin a thumaante in cingh takin a pia uh hi;

²²tua bang TOPA thupha piakte in gam a luah ding uh hi; ahi hangin a hiamsiatte a kihemkhia ding hi.

²³TOPA in mi khat lampi a lungdampih leh a kalsuannate kipsak hi;

²⁴a kimuktu kha zongin TOPA in a khutin lenkip ahi manin a puk kei ding hi.

²⁵Naupang ka hi ngei a tu-in ka tekta hi; tua sungin thumaante a kinusia ahi a, a tate khutdawh ngena vak ahi zongin ka mu ngei kei hi.

²⁶Amaute a tawntungin cingh uh a, baihtakin a leitawi uh hi; amaute tate thupha a kipia ding hi.

²⁷Siatna kiheisan inla na hoih sem in; tua hileh gam sungah na teng tawntung ding hi.

²⁸Ahang in, TOPA in thutangte it a, ama muan te a taisan ngei kei ding hi. Amaute kihu tawntung dinga, migilote suante ahileh a kihemkhia ding hi;

²⁹a thumaante in gam luahin a teng tawntung ding uh hi.

³⁰A thumaante kam in pilna paukhia a, ama leii in thutang a gen hi.

³¹Ama Pasian’ thukham a lungsim ah om a; a khete a tal kei hi.

³²A thumaante bukin migilote boka, amaute nuntakna mahmah a zong uh hi.

³³Ahi hangin TOPA in amaute vangliatna sungah, a thumaante nusia lo dinga, thukhenna ah a kimawhpaihsak kei ding hi.

³⁴TOPA ngak inla ama lampi tawn in, amah in gam luah dingin nang hong tawisang dinga, migilote a hepkhiat ciangin na mu ding hi.

³⁵Leihoihna-a po singkung hing tawh a kibang a khanpha mi gilo a tatsia khat ka mu hi;

³⁶ahi hangin mangpah-a a om nawn kei hi; amah zong ta lehang a kimu thei nawn kei hi.

³⁷A genbaang lote ngaihsunin a thutangte lungngai dih in; lemna a deih mipa adingin mailam hun a[64] a om lai hi.

³⁸Ahi hangin mawhneite khempeuh kisusia dinga; migilote mailam hun b[65] kikhaktan ding hi.

³⁹A thumaante’ hotkhiatna TOPA kiang pan hong pai-a, amaute lungkham hunin amah a kulhpi uh ahi hi.

⁴⁰TOPA in amaute huhin hukhia a; amaute in amah bel uh ahi manin migilote panin amaute hu-in a honkhia hi.