Read Zokam Phatna-late 39 Bible Online

Phatna-late 39 - Zokam bible

Phatna-late 39

¹Tumtheih makaipi ading. Jeduthun adingin David phuah. Keimah in, "Ka gamtatnate ah kidawmin a mawh lo dingin ka leii ka kem ding hi; ka omna ah migilote a om laisiah ka muk ah muktuam ka thuah ding hi," ka ci hi.

²Ahi hangin daitaka ka om dide ciang, a hoih khat nangawn ka gen loh ciangin ka lunggimna a khang semsem hi.

³Ka sungah ka lung so a, ka ngaihsut kawmkawmin meikuang hi; tua ciang ka leii-in thu ka gen a:

⁴" TOPA aw, ka nuntak hun beina le ka ni phazah hong lak in; ka nuntakna a beipah ding zia kei hong theisak in.

⁵Ka nuntak hun sung zapek cia bekbek na phasak a; nangma mai-ah ka nuntak kum bangmah tan ahi kei hi. Mihing khat nuntakna husan khat bek ahi hi.

⁶Mihing pen telmunmel om lo-a vaksuk vaktoh ahi hi: Ama a kibuaisakna a mawkna hi a; hauhna kholkhol ta leh kuan’n ngah ding cih a thei kei hi.

⁷"Ahi hangin Topa aw, tu-in bang zong ka hi hiam? Ka lametna nang sungah a om hi.

⁸Ka tatkhialhna khempeuh panin hong hon inla; mihaite simmawh hong hisak kei in.

⁹Ka dai dide hi; nang sem khin na hi manin ka kam ka kek kei ding hi.

¹⁰Na satna khauteep kei tung panin lakhia ta in; na khuttum a nong tupna in kong hong zothawh hi.

¹¹Mite amau mawhna hangin taihilhin na sektat a; ngetpi bangin amau hauhna na gaitum a - mihing pen husan khat bek ahi hi.

¹²" TOPA aw, kong thungetna hong za inla nong huh dinga kong kikona hong ngai in; ka kahna hong bengngonsan kei in. Ahang in, ka pate khempeuh bangin pemta le mikhualin nang tawh ka tengkhawm hi.

¹³Kei hong kimuhmawhbawl in, kei paikhia-a ka om nawnloh ma-in ka lungnop kik theih nadingin kei hong hawi in," ka ci hi.