Read Zokam Phatna-late 4 Bible Online

Phatna-late 4 - Zokam bible

Phatna-late 4

¹Tumtheih makaipa ading. Tumging khausai-a kisa David phatna-la khat. A thuman ka Pasian aw, nang kong sap ciangin hong dawng in. Ka lungdonna pan hong zangkhaisak inla, kei hong lainatin ka thungetna hong za in.

²Mihingte aw, ka minthanna bangtanvei maizumna suaksak lai ding na hi uh hiam? c[9] Bang tanvei ngaihsut khialhna itin pasian manlote zong lai ding na hi uh hiam? d[10]

³TOPA in a pasian-mite ama adingin sehtuam ahilam thei un; TOPA ka sap ciangin amah in hong za ding hi.

⁴Na heh laitakun mawh kei un; na lupna tunguah dai dide in ngaihsunsun un.

⁵Biakpiakna maan lui unla TOPA muang un.

⁶Mi tampi in, "A hoih khatpeuh kuan hong lak thei hiam?" ci-in dong uh hi. TOPA aw, na maitang vang kote tungah hong tangsak in.

⁷Amaute in an le zuthak a hauh hun ua a lungnop uh sangin a lianzaw lungnopna tawh ka lungsim nong dim hi.

⁸TOPA aw, nang bekin lungmuang takin hong tengsak na hi manin lumsukin lungnuamin ka ihmu ding hi.