Read Zokam Phatna-late 44 Bible Online

Phatna-late 44 - Zokam bible

Phatna-late 44

¹Tumtheih makaipa ading. Korah’ Tapate phuah. b[73] khat. Pasian aw, tanglai pek ka pate uh hun lai-a na bawlte amaute in hong gen uh a, ka bilun ka za uh hi.

²Na khutin minamte na hawlkhia a, ka pate uh na tengsak hi; mite tuanzanin ka pate uh na pungsak hi.

³A zawh uh gam amaute namsau hang hi lo a, amau ban in amaute a gualzosak hi lo hi; amaute it na himanin na taklam khut na ban le na maitang vangtang-in na gualzosak hi.

⁴Nangmah ka Kumpi ka Pasian, Jacob adingin zawhna a sehsakpa c[74] na hi hi.

⁵Nang hangin ka galte uh ka lehnawh zo uh a; nangma min hangin ka langte uh ka tuancil uh hi.

⁶Ka thalpeu ka muang kei hi, hong gualzosak ka namsau hi lo a;

⁷ka galte uh nangma hong zawhsak hi-in, hong langpangte na maizumsak hi.

⁸Sun tawntungin Pasian ka kisialhpih uh a, na min ka phat den ding uh hi.

⁹Ahi hangin tu-in kote hong nolhin nong niamkhiat a; ka galkap honte uh na kuankhiatpih nawn kei hi.

¹⁰Galte mai-ah ko nong nungkiksak a, ko hong ensante in hong lawkgawp uh hi.

¹¹Tuu banga kivalhtum dingin nong pia a, minamte lakah kote nong thehthang hi.

¹²Na mite sum tawmkha-in nong zuak a, bangmah metna tham na khawng kei hi.

¹³Ka vengte uh tungah nong maimawlsak a, ka kim ka pam ua omte simmawh le nuihsat nong suaksak hi.

¹⁴Minamte lakah thusia-gentehna nong suaksak a; mite in kote hong lupeisan uh hi.

¹⁵Sun nilohin ka maimawl a, ka maizum den hi,

¹⁶tua pen phulak hong sawm kagalte in ka mawhna zongin hong ciamnuih bawl hang ahi hi.

¹⁷Nang hong mangngilh loin na thukhun ka khialh loh uh hangin hihte khempeuh ko tungah hong tung hi.

¹⁸Ka lungsim uh nungkik loin; ka khe uh na lampi pan a pial kei hi.

¹⁹Ahi hangin kote hong gawizanin se-alte kua nong suah a, khuamial thukpi in kote hong khuh hi.

²⁰Eite in i Pasian min mangngilhin gamdang pasian lamah i khut i zak leh

²¹amah in lungsima thusim thei ahi nungsang, Pasian in phawkkhia lo ding ahi hiam?

²²Tua hi napi nangmah cihna-in sun nilohin sihna ka maituah uh a; a kigo ding tuu bangin kote hong kingaihsun hi.

²³Topa aw, khanglo in! Bang dia ihmu na hiam? Nangmah tho tawm in! Kote hong nolhsuak kei in.

²⁴Bang hangin na maitang sel a, kote gentheihna le hong kinetniamna mangngilh na hi hiam?

²⁵Kote leivui lak hong kidenna ta a, ka pumpite uh lei lakah a bok dipdep hi.

²⁶Tho in kote hong huh in; nangma itna kip hangin kote hong tankhia in.