Read Zokam Phatna-late 45 Bible Online

Phatna-late 45 - Zokam bible

Phatna-late 45

¹Tumtheih makaipa ading. "Unokte" aw in. Korah’ Tapate phuah. a[75] khat. Kitenna la. Ngaihsutna thupi khat in ka lungsim hong phuut-a, kumpipa ading la tangte suutin, ka leii laigelh siampa laikung khat ahi hi.

²Nang mi hoih pha pen na hi a, Pasian in thupha hong piak densa ahi nungsang; na mukte hehpihna tawh a kinilh hi.

³A thahatpa aw, na pangah na namsau kuah inla; thupina le kumpi hihna silh ta in.

⁴Thutak kiniamkhiatna le thumaanna hanga gualzo dingin na kumpi thupina tawh tuangta in; na taklam khut in a mulkimhuai sepnate lak ta hen.

⁵Na thaltang hiamte in kumpipa’ galte lungtang sunlet henla nangma khe nuai-ah minamte puk uh hen.

⁶Pasian aw, na kumpi tokhom a tawntungin omden dinga; thutang sik ciangkhut khat na kumpi-gam sik ciangkhut hi ding hi.

⁷Thumaanna na it a gitlohna na mudah hi; tua ahi ciangin Pasian, na Pasian in nopna sathau hong nilhna tungtawnin na pawlte tungah hong koih hi.

⁸Na puansilhte myrrh le aloes le thalsing namtuite-in a namtui hi; saiha-a kizem kumpi innte panin khausai tumtheihte in nang hong kipaaksak hi.

⁹Na pahtawi numeite lakah kumpipa’ tanute kihel a; na taklam ah Ophir khama kizem kumpi mo om hi.

¹⁰Tanu aw, ngai in ngaihsun inla na bil ngat in: Na mite le na pa innkuante mangngilh in.

¹¹Na mel hoihna in kumpipa lungtungsak hi; na topa ahi manin amah pahtawi in.

¹²Tyre Tanu, letsong b[76] tawh hong kuan dinga; mihaute in na angvanna hong zong ding uh hi.

¹³Kumpipa’ tanu a inndei sungah minthanna khempeuh tawh om a; kham tawh a puantual kigankhawm hi.

¹⁴Puangial tuamtuam tawh kizemin kumpipa kiangah kipaipih hi; a lawm nungak bitte in amah zui uh a, nang tungah hong puak uh hi.

¹⁵Amaute lung nuam le kipaakin kilutpih a; kumpipa’ inn ah lut uh hi.

¹⁶Na tapate in na pate’ mun luah ding uh a; gam sung khempeuh ah amaute gamukte na suaksak ding hi.

¹⁷Nang ciamtehna khang tawntungin ka kipsak suak dinga; tua hangin minamte in a tawntungin nang hong phatden ding uh hi.