Read Zokam Phatna-late 5 Bible Online

Phatna-late 5 - Zokam bible

Phatna-late 5

¹Tumtheih makaipa ading. Tamngaite a tum. David phatna-la khat. TOPA aw, ka thute na bil hong ngat-in ka khuisatnate hong thudon in.

²Ka Kumpi le ka Pasian aw, nang tungah huh ding hong ngen ka hi manin, kong kikona hong ngai in.

³TOPA aw, zingsang in ka aw na za hi; zingsangin na mai-ah ngetnate kong tun a, lamentakin ka ngak hi.

⁴Nang, thu sia ah nuam a sa Pasian na hi kei a, nang tawh migilote a tengkhawm thei kei hi.

⁵Nang omna ah a ki-uangsakte ding thei lo a, khialhna a bawl khempeuh na mudah hi.

⁶Zuauthu gente na susia a; sisan suahte le mi khem theite TOPA in kih hi.

⁷Ahi hangin nangma lainatna lianpi hangin kei, na inn sungah kong lut dinga, zahtakna tawh na biakinn siangtho lamah kong kunsuk ding hi.

⁸TOPA aw, ka galte hangin nangma thumaanna ah hong pi in - ka mai-ah nangma lampi tangsak in.

⁹Amaute kam pana kammal khat beek muantak lo a, a lungsim uh kisiatna tawh dim hi. Amaute gawl, han kihongsa hi a; a leii-un zuauthu a gen uh hi.

¹⁰Pasian aw, amaute mawh khusak in! Amaute sawmsimnate amau pukna suaksak in. Amaute in nang hong lehdo uh ahi manin amaute mawhna tampite hangin amaute hawlmang in.

¹¹Ahi hangin nang hong beelte khempeuh lungdamin amaute in lungnuamin la sasa uh hen. Na min a itte nang sungah a kipak nadingun amaute tungah na liahna zal in.

¹²TOPA aw, a thumaante thupha na pia takpi a, na angvanna tawh amaute lum bangin na sung hi.