Read Zokam Phatna-late 50 Bible Online

Phatna-late 50 - Zokam bible

Phatna-late 50

¹Asaph phuah phatna-la khat. Thahat Pa, Pasian, TOPA pau-a, ni suahkhiatna panin ni tumna mun dong leitung kaikhawm hi.

²Mel hoihna kim tawh Zion panin Pasian tangkhia hi.

³Eite Pasian hong pai-in a dai kei ding hi; a mai ah mei khat in valhtum a, a kimkot ah pingpei a kinuai hi.

⁴A mite tungah thu a khen theih nadingin tunga vante le leitung sam a:

⁵"Biakna pia a kei tawh thukhun a bawl ka sianthosaksate aw, ka kiangah hong kikhawm un," a ci hi.

⁶Tua hi-a Pasian mahmah thukhenpa ahi manin vante in ama thumaanna a tangko uh hi.

⁷"Ka mite aw, za un, Israel aw, thu ka gen dinga note langah teci ka pang ding hi: Keimah Pasian, note Pasian ka hi hi.

⁸Ka mai-a na hih den uh biakpiaknate, meihal biaknate hangin hong taihilh ka hi kei hi.

⁹Na bawngbuk a bawngtal ahikeh na gan huang a keelte ka kisam kei hi;

¹⁰ahang in, tulak a ganhing peuhmah, mual tulkhat tunga ganhon omte kei aa ahi hi.

¹¹Mualliante kawma om vasa khempeuh ka thei a, gam sunga om ganhingte khempeuh kei aa ahi hi.

¹²Leitung buppi le a sunga om khempeuh kei aa ahi manin ka gil a kial zongin nang kong ko kei ding hi.

¹³Keimah in bawngtal sa ne-in keelte sisan dawn ka hi hiam?

¹⁴Pasian tungah lungdam koh biakpiakna pia un, Sangpen Pa tungah na thuciamte uh tangtun unla,

¹⁵na lungkham ni-un kei hong sam un; keimah in note kong hukhia dinga, note in kei nong pahtawi ding uh hi," a ci hi.

¹⁶Ahi hangin migilote tungah Pasian in: "Ka thukhamte gen nading le ka thukhunte na muka na gen nading bang thuneihna nei na hi uh hiam?

¹⁷Ka lamlahna na mudah a, ka kammalte na nunglam ah na pai hi.

¹⁸Guta khat na muh ciangin amah na pawlpih a; angkawmte lakah na kihel hi.

¹⁹Na kam, siatgenna-in na zanga na leii, zuaugenna-in na zang hi.

²⁰Na sanggampa na langgen den a, na nu’ tapa na gensia hi.

²¹Na sepsa hihte hi napi in ka dai dide hi; nang tawh a kibang a[89] ding nong sa hi. Ahi hangin nang hong taihilhin na maitang mahmah ah kong mawhsak ding hi.

²²"Pasian a mangngilh note aw, hih thu na ngaihsut kei uh leh kuama hut lohin kong balnen ding hi:

²³Lungdamkohna biakna a piapa kei hong pahtawi hi-a, Pasian’ hotkhiatna amah b[90] ka lah theih nadingin lamsial ahi hi," a ci hi.