Read Zokam Phatna-late 51 Bible Online

Phatna-late 51 - Zokam bible

Phatna-late 51

¹Tumtheih makaipa ading. David phatna-la khat. David in Bathsheba ang a kawm khit ciangin ama kiangah kamsangpa Nathan a va pai lai a. Pasian aw, a vul thei lo na itna tawh kizui-in kei hong lainat in, na khuatuahna lian tawh kizui-in ka khialhnate hong paihkhiatsak in.

²Ka khialhna khempeuh silkhia inla, ka mawhna hong sawpsiang in.

³Ahang in, ka tatkhialhnate ka thei-a, ka mai ah ka mawhna a om den hi.

⁴Thu na gen ciangin a thumaan na hilam a kitheih nading, thu na khen cianga dik hong tangsak dingin; nang tung, nang tektek tungah ka mawh a, na muhna ah siatna ka hih khin hi.

⁵Mawh neisa-a suak ka hi takpi a, ka nu in mawh neisa-a hong paii a hi hi.

⁶Nang in sunglam a thutak c[91] na deih takpi a, a sungtawngpen mun ah pilna nong hilh d[92] hi.

⁷Puknah in hong siangsak lecin ka siang dinga; kei hong sawp lecin vuk sangin ka pakzaw ding hi.

⁸Lungnopna le kipahna hong zasak in; na sukzansa guhte nuamsak in.

⁹Ka mawhnate buksan inla ka khialhna khempeuh phiatkhia in.

¹⁰Pasian aw, ka sungah lungsim siang hong piangsak inla akip ka lungsim thak suaksak in.

¹¹Na omna panin kei hong paikhia kei inla kei tung pan na Khasiangtho hong lakkhia kei in.

¹²Na hotkhiatna lungnopna hong pia kik inla a thumang nuam lungsim hong guanin hong dingkipsak in.

¹³Tua ciangin a khialte tungah na lampite ka hilh dinga, mawhneite nang lamah hong kihei kik ding uh hi.

¹⁴Kei hong honkhiapa Pasian, sisan suah mawhna panin kei hong honkhia in Pasian aw, tuateh ka leii in nangma thumaanna la a sa ding hi.

¹⁵Topa aw, ka muk kak in, tua hileh ka kam in nangmah phatna a pulak ding hi.

¹⁶Biakpiakna hangin na lungkim kei hi, lungkim lecin kong puak ding hi; meihal biaknate zong nuam na sa tuan kei hi.

¹⁷Pasian biaknate e[93] ka biakpiakna in ahileh a tamkham lungsim ahi hi; Pasian aw, a kitamkham lungtang kisikna na nolh kei ding hi.

¹⁸Nangma hoihsakzia-in Zion daupaisak inla; Jerusalem kulhte lam in.

¹⁹Tua hileh thumaanin biakna kipia dinga, meihal biakna buppite in nang hong lungkimsak in; tua ciangin na biakna-tau tungah bawngtalte hong kipia ding hi.